फाइल तस्वीर

माओवादीले हत्या गरेका कृष्णप्रसाद अधिकारीकी आमा गंगामाया अधिकारीको स्वास्थ्य अवस्था थप विग्रिएपछि उनलाई गंगालाल हृदय केन्द्र बाँसबारी लगिएको छ ।

लामो समय खाना नखाँदा कमजोर शारीरिक अवस्था भएकी गंगामायाको दुई दिनअघि बायाँ खुट्टाको भित्री नसामा रगत जम्ने समस्या (डिप भेन थ्रम्बोसिस ‘डीभीटी’) भएको र हिजोदेखि दायाँ खुट्टामा पनि डीभीटी देखिएको वीरअस्पतालका निमित्त निर्देशक डा. हरिशचन्द्र उप्रेतीले जानकारी दिए ।

उनका अनुसार दायाँ तिघ्रामा समेत देखिएको डीभीटी फोक्सो, टाउको वा शरीरका अन्य अंगमा समेत हुने र मानिसको ज्यान जानेसमेत सम्भावना हुन्छ ।

“विशेषज्ञ चिकित्सकहरुको सल्लाह र मानवअधिकारवादीहरुसँगको सहकार्यमा उहाँ (गंगामाया) लाई गंगालाल अस्पतालमा रेफर गरिएको छ,” उप्रेतीले भने, “गंगालाल हृदय केन्द्रमा यससम्बन्धी राम्रो उपचार हुने भएकाले त्यहाँ पठाएका हौं ।”

गोरखा फुजेलका गंगामाया र नन्दप्रसाद अधिकारीका छोरा १७ वर्षीय कृष्णप्रसादलाई माओवादीले अपहरण गरी २४ जेठ २०६४ मा चितवन बकुल्लर चोकमा हत्या गरेका थिए ।

त्यसयता न्यायको खोजीमा लामोसमयसम्म संघर्ष गरेका नन्दप्रसादको वीरअस्पतालमै ३३२ दिन लामो अनशनका बेला ६ असोज २०७१ मा निधन भएको थियो ।

पति र पुत्र वियोग सहेकी गंगामाया अहिलेसम्म पनि अस्पतालमै छन् । अन्त्येष्टि हुन नसकेको नन्दप्रसादको शव अझै त्रिवि शिक्षण अस्पताल महाराजगञ्जमा छ ।

प्रतिकृया दिनुहोस