भारत भ्रमणमा रहेका प्रधानमन्त्री केपी शर्मा ओलीलाई भारतीय प्रधानमन्त्री नरेन्द्र मोदीले आज राष्ट्रपति भवनमा स्वागत गरेका छन् ।

यसअघि राष्ट्रपति भवनमै आयोजित विशेष कार्यक्रममा ओलीलाई भारतीय सेनाको एक टुकडीले सम्मान गारद (गार्ड अफ अनर) प्रदान गरेको थियो ।

ओलीसँगै उपप्रधान तथा परराष्ट्रमन्त्री कमल थापा, गृहमन्त्री शक्ति बस्नेत, अर्थमन्त्री विष्णु पौडेल पनि कार्यक्रममा सहभागी थिए । भारतका तर्फबाट परराष्ट्रमन्त्री सुष्मा स्वराज, गृहमन्त्री राजनाथ सिंह, अर्थमन्त्री अरुण जेटली, रक्षामन्त्री मनोहर पर्रिकरको पनि उपस्थिति थियो ।

सम्मान ग्रहणको कार्यक्रम लगत्तै राजघाटस्थित महात्मा गान्धीको समाधीस्थल पुगेर पुष्पहार अर्पण गरेका ओलीसँग विदेशमन्त्री सुष्मा स्वराजले भेटवार्ता गरेकी छन् ।

समकक्षी नरेन्द्र मोदीसँगको भेटवार्ता अघि ओली–स्वराज वार्ता भएको हो ।

त्यसपछि भारतीय प्रधानमन्त्री नरेन्द्र मोदी र ओलीबीच हैदरावाद हाउसमा १२ बजे भेटवार्ता हुनेछ । उक्त भेटघाटमा केही महत्वपूर्ण सम्झौताहरुमा समेत हस्ताक्षर हुन सक्ने बताइएको छ ।

यस्तै आजै प्रधानमन्त्री ओलीको भारतीय गृहमन्त्री राजनाथ सिंह र अर्थमन्त्री अरुण जेट्लीसाग भेट वार्ता हुने कार्यक्रम तय गरिएको छ ।

आजै अबेर साँझ भारतीय राष्ट्रपति प्रणव मुखर्जीसँग पनि ओलीको औपचारिक भेटवार्ता हुनेछ ।

तस्वीरहरु: भारतीय विदेशमन्त्रालयको वेभसाइटबाट

प्रधानमन्त्री ओली ६ दिने राजकीय भ्रमणका लागि शुक्रबार भारत गएका हुन्।

प्रतिकृया दिनुहोस