एनसेलको कर्मचारी बनेर ग्राहकवाट लाखौं ठगी गरेको अभियोगमा पक्राउ परेका प्रकाश दाहाल दाँया र मेघनाथ गिरी वाँया । तस्वीर लक्ष्मी गौतम

एनसेल एप प्रयोग गरी सर्वसाधारणलाई झुक्याएर लाखौं ठगी गर्ने गिरोहका दुई जनालाई प्रहरीले पक्राउ गरी सार्वजनिक गरेको छ ।

पक्राउ पर्नेहरुमा झापा गौरादह–९ का १८ वर्षीय प्रकाश दाहाल र मोरङको पथरी–९ का ३२ वर्षीय मेघनाथ गिरी छन् ।

उनीहरुले एनसेलकै पूर्व कर्मचारी भारत राजस्थानका सुमित शर्मासँगको मिलेमतोमा एनसेलकै प्रयोगकर्ताहरुवाट लाखौं ठगी गरेको पाँचथर प्रहरी प्रमुख कृष्णप्रसाद कोइरालाले जानकारी दिए ।

कोइरालाका अनुसार उनीहरुले आफ्नो मोवाइलमा एनसेल एप डाउनलोड गरी विभिन्न स्थानका एनसेल नम्वर इन्ट्री गरेर प्रयोगकर्ताले रिचार्ज गरेको मिति, मौजादत रहेको व्यालेन्स आदि पत्ता लगार्ई ठगी गरेको पाइएको छ ।

यसरी भयो ठगी
अभियुक्तहरुले पहिले एनसेल एपमा विभिन्न स्थानका ग्राहकको नम्वर इन्ट्री गरेर ती नम्वरमा फोन गर्दै विभिन्न बहानामा ठगी गरेको प्रहरी अनुसन्धानमा खुलेको कोइराला वताँउछन ।

उनका अनुसार पिन नम्वर म्यासेज पठाइएका नम्वरहरुमा फोन गर्दै उनीहरुले ‘हामी एनसेलका कर्मचारी हौं, तपाईले यसअघि प्रयोग गरेको रिचार्ज कार्डमा पुरस्कार परेको छ । त्यस्का लागि कर वापतको रकम अग्रिम भुक्तानी गर्नुस’ भन्दै पैसा उठाउने गरेका थिए ।

हालसम्मको प्रहरी अनुसन्धानमा उनीहरुले मेचीको पाँचथरदेखि कास्कीको पोखरासम्मका १० जना एनसेल प्रयोगकर्तावाट १६ देखि ३६ हजार रुपैंयाका दरले ठगी गरेको पुष्टि भइसको छ ।

यसरी ठगिनेमध्ये अधिकांश महिला छन । ठगिने मध्येका तेह्रथुम छातेढुंगा–६ का तारा सुनारले प्रहरीमा दिएपछि अनुसन्धान प्रकृया शुरु गरेको पाँचथर प्रहरीले जनाएको छ ।

को को ठगिए ?
प्रहरीका अनुसार उनीहरुले एक दिनमा एउटै मात्रै एनसेल नम्वर प्रयोग गर्ने गरेको खुलेको छ । उनीहरुले माघ १० देखि फागुन ४ गतेसम्ममा २८ वटा एनसेल नम्वर प्रयोग गरेर १० जनालाई ठगी गरेको पुष्टि भइसकेको छ भने अन्य पीडितले जाहेरी दिनेक्रम जारी छ ।

प्रनाउ कोइरालाका अनुसार उनीहरुले छातेढुंगाका तारा सुनार र फिदिम १ का प्रेम तामाङवाट १६–१६ हजार, पोखराकी निमा लामावाट ३६ हजार,विर्तामोडका गोपाल ढकाल, गौरादहका पुण्यदेवी भट्टराई, गौरीमाया खड्का र इलामका विमल राई सहित ७ जनावाट २६–२६ हजारका दरले ठगी गरेको पुष्टि भइसकेको छ ।

सिम र पैसा झिक्न प्रयोग भएका कागजात सवै नक्कली
प्रहरी अनुसन्धानमा उनीहरुले सिमकार्ड झिक्न प्रयोग गरेको नागरिकतादेखि पैसा झिक्न प्रयोग गर्दै आएका नागरिकता र लाइसेन्स सवै नक्कली भएको पुष्टि गरेको छ ।

उनीहरुले एउटै फोटो प्रयोग गर्दै कहिले सुदेश कार्की त कहिले सञ्जय दाहालका नामवाट नक्कली लाइसेन्स बनाएर आइएमइ र विभिन्न वैंकका काउण्टरवाट पैसा झिकेको पुष्टि भएको छ ।

उनीहरुले पहिलो चरणमा झापाको झिलझिले र मोरङको पथरी र त्यसपछि काठमाण्डौका विभिन्न स्थानवाट पैसा झिकेका छन ।

प्रमुख अभियुक्त एनसेलकै पूर्व कर्मचारी
प्रहरीका अनुसार ठगी प्रकरणका प्रमुख अभियुक्त भारत राजस्थानका सुमित शर्मा हुन ।

पहिले एनसेल कम्पनीमै केही समय काम गरेका उनी यसअघि पनि ठगी प्रकरणमा जेल परिसकेका व्यक्ति हुन ।

कम्युटर र प्रविधिमा राम्रो दख्खल राख्ने उनले नक्कली कागजात बनाएर दाहाल र कार्कीलाई प्रयोग गर्दै पैसा ठग्ने गरेको पाइएको प्रहरीले जनाएको छ ।

जेलवाट निस्केपछि केही महिना यता उनी नेपाल–भारत सीमा क्षेत्रमा बसेर ठगी गिरोह सञ्चालन गरिरहेको प्रहरीले जनाएको छ । प्रहरीले उनलाई भने पक्राउ गर्न सकेको छैन ।

पक्राउ परेकामध्ये दाहालले विभिन्न स्थानका एनसेल नम्वरमा फोन गरेर पैसा पठाउन लगाउने गर्थे भने गिरी पैसा झिक्न जाने काममा खटाइएका थिए ।

पैसा झिकेपछि शर्मा, दाहाल र गिरीले भागवण्डा गरेर लिने गरेको पनि प्रहरी अनुसन्धानमा खुलेको छ ।

नेपाल प्रहरीको केन्द्रीय अनुसन्धान ब्यूरोको सहकार्यमा ४ फागुनमा काठमाडौंमा पक्राउ परेका उनीहरुलाई आइतवार पाँचथर पु¥याएर प्रहरीले पत्रकार सम्मेलन मार्फत सार्वजनिक गरेको हो ।

लक्ष्मी गौतम, पाँचथर

प्रतिकृया दिनुहोस