चरम घरेलु हिंसामा परेकी एक किशोरी न्याय र संरक्षणको खोजीमा महिला तथा बालबालिका कार्यालय जाजरकोटमा आईपुगेकी छन् ।

१८ वर्ष नपुग्दै दुईवटा विवाह गरिसकेकी रुकुम मुसिकोटकी माया गिरी अघिल्ला र हालका पति दुवैजनाको कुटाई, यातना र यौन हिंसाले आफूलाई थिलोथिलो पारेको बताउँछिन् ।

माईती रुकुमको मुसिकोट भए पनि बाबुआमा मजदुरीका लागि भारत जाने गरेकाले मायाको बाल्यकाल भारतमै वित्यो ।

त्यसैबीच बाबुले अर्की श्रीमती भित्र्याए, आमा पनि अर्कैसँग गइन् । एक्ली मायाको जिम्मेवारी लिएका काकाले भारतमै रहेका जाजरकोट काफ्लाका गोविन्द विटालुसँग विवाह गरिदिए । विवाहपछि माया जाजरकोटस्थित गोविन्दको घर स्याहार्न आइपुगिन १२ वर्षकै उमेरमा ।

दुई वर्षसम्म राम्रै गरेका श्रीमानले त्यसपछि भने आफ्ना ६० वर्षीय मामासँग यौन सम्बन्ध राख्न दबाब दिनथालेको माया बताउँछिन् ।

‘मामा सँग सुत्, उसैसँग विहे गर’ भन्दा नमानेपछि दिनहुँ कुटपिट गर्ने, पासो लगाएर मारिदिन्छु भन्दै पटक पटक झुण्ड्याउने प्रयास गरेको मायाले सुनाइन् ।

“धेरै दिन भोकै बसें, खान पनि दिएनन्, निकै दुखले रोईरोई एक वर्ष वित्यो,” उनले भनिन् ।

मायाका अनुसार पतिको घरमा बस्नै नसक्ने भएपछि भागेर उनी गाँउकै राजु शाहको शरणमा गइन् । एक वर्ष शाहको घरमा मजदुरी गरेर बसेकी उनले त्यसपछि गाउँकै प्रेम गन्धर्बसँग विहे गरिन् ।

गन्धर्बले पनि एक वर्षसम्म राम्रै गरेको त्यसपछि कुटपिट, जवर्जस्ती हुँदै खानै नदिने हुनथालेपछि मायालाई त्यहाँबाट पनि भाग्नु पर्‍यो ।

“बाबु आमा भारतमा कहाँ छन् थाहा छैन, आफन्त अरु चिन्दैन, कहाँ जाउँ,” मायाले भनिन् ।

त्यत्तिकै भौंतारिरहेकी उनलाई झाप्रा मछाईनका स्थानीय शिक्षक जनक बस्नेतले दुई महिना संरक्षण दिए ।

उनी घर फर्कन नमानेपछि दलित नेटवर्क जाजरकोटका जिल्ला अध्यक्ष गोपाल नेपालीले सदरमुकाम ल्याएर महिला तथा बालबालिका कार्यालयमा बुझाईदिएका छन् ।

आफ्ना बाबुको नाम समेत थाह नभएकी उनले आमाको नाम भने निर्मला गिरी भएको बताइन् ।

सानै उमेरमा ठूलो दुख पाएकी किशोरीलाई कसरी संरक्षण दिने, कहाँ राख्ने भन्ने बारे छलफल भइरहेको महिला तथा बालबालिका अधिकृत प्रज्ञा निरौलाले बताइन् ।

मायाको अघिल्ला दुवै पतिसँग न त विवाह दर्ता छ, न सम्बन्ध विच्छेद नै ।

प्रहरी मार्फत उनका दुवै पतिलाई खोजेर सम्पर्कमा ल्याईदिन आग्रह गरिएको निरौलाले बताईन ।

हिंसाको चपेटामा परेकी माया बेलाबेला विक्षिप्तजस्तै कराउँछिन, “मलाई बचाउनुस्, तिनीहरुले मार्छन, बेचीदिन्छन,” भन्दै ।
-राजेन्द्र कार्की, जााजरकोट

प्रतिकृया दिनुहोस