आगामी २०–२३ फागुनमा हुन लागेको १३औं महाधिवेशनमा पेश हुने नीति तथा कार्यक्रमको मस्यौदामाथि केन्द्रीय सदस्यहरुले चर्काे आलोचना गरेका छन् ।

कार्यबाहक सभापति रामचन्द्र पौडेल संयोजकत्व समितिले पेश गरेको नीति तथा कार्यक्रमको मस्यौदाले संविधान जारी भएपछिको अवस्था समेट्न नसकेको भन्दै आलोचना गरिएको छ । अधिकांशले पुनःलेखनको माग गरेका थिए ।

केन्द्रीय सदस्य रामशरण महतले नीति तथा कार्यक्रम अमूर्त भएको र नयाँ परिवेशअनुसारको मुद्दा समेट्न नसकेको बताए । उनले पुनःलेखनको माग गरेका थिए ।

केन्द्रीय सदस्य गगन थापाले संविधान बनेपछिको नयाँ चरणमा जनतालाई उत्साहित पार्ने कार्यक्रम नआएको बताए । थापाले अधिकांश कार्यक्रम पुरानै दोहोरिएर आएकाले संविधान कार्यान्वयनको ठोस कार्यक्रम नआएको बताए ।

उनले भने, “मधेश आन्दोलन, नाकाबन्दीजस्ता महत्वपूर्ण राजनीतिक विषय नै छुटेको छ । अवको ४÷५ वर्षभित्र मुलुकलाई कहाँ पुर्‍याउन चाहेको हो ? भन्ने कुरा स्पष्ट हुनुपर्छ ।”

धनराज गुरुङले अस्पष्ट नीति तथा कार्यक्रम आएकाले प्रष्ट पार्न सुझाव दिए । बैठकमा नेताहरु सुर्यमान गुरुङ, कविर तामाङ, मीनबहादुर विश्वकर्मा, जीवन शाही, शंकर भण्डारी, प्रदिप पौडेल, कमला पन्लगायत १५ जनाले बोलेका थिए ।

चर्काे आलोचनापछि कार्यबाहक सभापति पौडेलले सवैको सुझाव समेटेर नीति तथा कार्यक्रम पुनःलेखन गर्ने बताए । प्रवक्ता दिलेन्द्रप्रसाद बडूले नीति तथा कार्यक्रममाथि अव लिखित सुझाव मात्रै लिइने बताए ।

विधान संशोधन मस्यौदा समितिका संयोजक आनन्दप्रसाद ढुंगाना अनुपस्थित भएकाले उक्त मस्यौदा भने पेश हुन सकेन । आजको बैठकमा विधान संशोधन मस्यौदा पेश गर्ने कार्यक्रम तय भएको थियो ।

–कपिल भट्ट, काठमाडौं

प्रतिकृया दिनुहोस