नेपाल रेडक्रस सोसाइटी उपशाखा दमकले सर्प संग्रहालय स्थापना गरेको छ ।

१५ फागुनमा उपशाखाका पूर्व सभापती मानबहादुर बुढाथोकीले दमक १२– मा बिषालुदेखि सामान्य सम्मका ४२ प्रजातिका ७८ मृत सर्पको विवरण र सर्प सम्बन्धी प्रचार सामग्री भएको संग्रहालयको उद्घाटन गरे ।

दुई दशकअघि आफैलाई सर्पले डसेपछि बुढाथोकी उपशाखा दमकको संस्थापक अध्यक्ष बनेका थिए ।

उनको अगुवाइमा २०५५ सालमा सर्प डसाईको उपचार केन्द्र स्थापना गरेको थियो ।

सर्पले डसेका मानिसहरु उपचारको लागि आँउदा कतिपयले सर्प समेत मारेर ल्याउने गर्दछन् ।

तिनै मरेका सर्पहरु भेलागरेर संग्रहालय बनाइएको उपशाखाका सभापति लिला गुरागाँईले बताए ।

संग्रहालयमा ४२ प्रजातिका ७८ मृत सर्प राखिएका छन् । गुरागाँईले जीव बिज्ञानका बिधार्थी र जानकारी राख्न चहाने सबैलाई खुल्ला गरिएको संग्रहालयमा जिँउदा र मरेका सर्पहरु थप्दै लगिने योजना सुनाए ।

उनले पाँचलाखको खर्चमा संग्रहालय स्थापना गरिएको बताए ।

दुईजना स्वास्थ्यकर्मी राखि उपशाखाले १७बर्ष अघि स्थापना गरेको सर्प डसाईको उपचार केन्द्रमा हाल चिकित्सक सहित ६जना स्वास्थ्यकर्मी कार्यरत छन् ।

दमकको यो उपचार केन्द्रमा बार्षिक एकहजार माथि सर्प डसाईका बिरामी आउने गरेको र त्यसको सयकडा पाँच बिषालु सर्पले डसेका हुने गर्दछन् ।

नेपालमा पाइने ८९ प्रजातिका सर्प मध्ये १७ बिषालु प्रजातिका छन् । तिनमा कमन कोब्रा, किङ्ग कोब्रा, कमन करेत, ब्याण्डेड करेत, वाल्स करेत, लेजर ब्ल्याक करेत, ग्रेटर करेत र भाइपर जस्ता बिषलु सर्पहरु पर्दछन् ।
गोपाल गडतौला, झापा

प्रतिकृया दिनुहोस