भुटानी मानवअधिकारवादी नेता टेकनाथ रिजालले नेपालका शिविरमा दर्ता र सहायता बिना बसेका करिब पाँचहजार शरणार्थीबारे नेपाल सरकारले छिटो निर्णय लिनुपर्ने बताएका छन् ।

“खेदिएका हुन, भुटानी हुन भन्ने प्रमाण पनि छ” झापा बिर्तामोडस्थित आफ्नो निर्वासन निर्वासमा भुटानीहरुसँगको अन्तरकृयामा रिजालले भने, “नेपालको गृहमन्त्रालयले दर्ता रोक्नुको कारण म देख्दिन् ।”

झापा र मोरङका शिबिरमा रहेका एकलाख १७ हजार भुटानी शरणार्थीमध्ये एकलाख बढी पुनर्वासमा युरोप र अमेरिका गइसकेका छन् । पुनर्वास जाने क्रम सन २०१७ सम्म चलिरहने बताइएको छ ।

गृहमन्त्रालयले अन्तिमपटक सन २०१२ मा दुईहजार बढी आवेदकमध्ये छानविन गरी एकहजार आठसय भुटानी शरणार्थीको दर्ता गरेको थियो ।
यहाँका शिबिरमा करिब १७ हजार दर्ता भएका शरणार्थी र त्यसबाहेक करिब पाँचहजार दर्ता नभएका भुटानी रहेको दर्ता बिहिन भुटानीको समूहका रबिन गुरुङले बताएका छन् ।

सन १९९२ देखि पूर्वी झापाको काँकडभिट्टा सीमा नाकाबाट नेपाल पसेका भुटानी शरणार्थीको गृहमन्त्रालयले स्क्रिनिङ गरेर दर्ता शुरु गरेको थियो, जुन सन १९९८मा बन्द भएको थियो ।

तर भुटानबाट ढिलो खेदिएका, बर्षाैंपछि भुटानी जेलबाट छुटेर आफन्त खोज्दै शरणार्थी शिबिर आएका र लामो समयसम्म शिबिर बाहिरको श्रम बजारमा पसेका भुटानी दर्ता बिनै रहेका थिए ।

यहाँका शिबिरमा दर्ता भएका शरणार्थीले मात्र खाद्य, स्वास्थ्य, शिक्षा र बासको सहायता पाँउछन् ।

केहीदिन अघि प्रधानमन्त्री केपी ओलीलाई भेटेर फर्किएका नेता रिजालले प्रम ओली छुटेका शरणार्थीको दर्तामा सकारात्मक रहेको बताए ।
उनले भने, “पहिचान र सहायता नपाउनु ब्यक्तिको जीवनको अधिकार माथिको प्रश्न हो ।”

हालसम्म दर्ता नभएका कारण सहायताबाट बञ्चित रहेका भुटानीहरु नेपाली श्रम बजारमा मजदुरी गरेर पेटपालो गरिरहेका छन् ।
गोपाल गडतौला, झापा

प्रतिकृया दिनुहोस