नेपाली कांग्रेसका नेता कृष्णप्रसाद सिटौला समूहले भोलि, १९ फागुन दिउँसो सभापतिलगायतको पदहरुमा उम्मेदवारी घोषणा गर्ने भएको छ ।

काठमाडौंको बत्तिसपुतलीस्थित अनुपमा फुडल्याण्डमा पत्रकार सम्मेलन गर्दै उम्मेदवारी घोषणा गर्ने तयारी भइरहेको उनका सहयोगी किरण सिटौलाले बताए । उनका अनुसार पदाधिकारीमा को–को रहने भन्ने टुंगो आज साँझसम्म लगाइने भएको छ ।

निर्वाचित महामन्त्रीमा गगन थापा रहने निश्चितजस्तै भइसकेको सिटौला समूहमा अन्य पदहरु मिलाउने प्रयत्न भइरहेको छ । २०–२३ फागुनमा हुन लागेको १३औं महाधिवेशनमा सिटौला समूहको उम्मेदवारीले त्रिपक्षीय भिडन्त हुने भएको छ ।

यसअघि कार्यबाहक सभापति रामचन्द्र पौडेल र बरिष्ठ नेता शेरबहादुर देउवाले उम्मेदवारी घोषणा गरिसकेका छन् । तर, दुवै नेताले प्यानल घोषणा भने गरेको छैन ।

संस्थापनबाट पौडेल र असन्तुष्टबाट देउवाले पनि भोलि नै प्यानल सार्वजनिक गर्ने संभावना रहेको छ ।

स्रोतका अनुसार अहिले पनि सिटौला मनाउन संस्थापनका नेताहरुले छलफल चलाइरहेका छन् । सिटौलाले भने संस्थापनको आफू उम्मेदवार नबने उम्मेदवारी फिर्ता नलिने अडान छाडेका छैनन् ।

–कपिल भट्ट, काठमाडाैं 

प्रतिकृया दिनुहोस