बर्दिया राष्ट्रिय निकुञ्जको बबई उपत्यकामा एक कार्यक्रमका बीच गैंडा सारिएकोे छ ।

विश्ववन्यजन्तु दिवसको अवसर पारी चितवन राष्ट्रिय निकुञ्जबाट ल्याईएको सेटेलाईट रेडियोकलर जडित एउटा भाले गैँडा १९ फागुनमा बर्दिया निकुञ्ज अन्तर्गतको बबई उपत्यकामा छोडिएको हो ।

तीनवटा गैंडा एकैपटकमा सारिने कार्यक्रम रहे पनि चितवन निकुञ्जमा एउटा गैंडामात्रै नियन्त्रणमा आएपछि हालका लागि एउटामात्रै सारिएको हो । अन्य गैंडा केही दिनमै सारिनेछ ।

गैंडा स्थान्तरणका अवसरमा आयोजित कार्यक्रममा वन तथा भूसंरक्षण मन्त्री अग्निप्रसाद सापकोटा, राष्ट्रिय प्रकृति संरक्षण कोष, डब्लुडब्लुएफ, मध्यवर्ती क्षेत्र व्यवस्थापन समिति, पत्रकार, संरक्षणकर्मी, चोरी शिकार नियन्त्रण युवा परीचालन अभियानका युवा र स्थानीय सर्वसाधारणको सहभागिता थियो ।

चितवनबाट गैंडा लिएर १८ फागुन बेलुका ९ बजे हिँडेको टोली अर्को दिन विहान ९ बजे आईपुगेको थियो ।

नेपाल सरकारको निर्णय अनुसार बर्दिया राष्ट्रिय निकुञ्जको बबई उपत्यकामा १५ वटा गैंडा स्थानान्तरण गर्र्ने बताईएको छ ।

चितवन राष्ट्रिय निकुञ्जबाट बर्दिया निकुञ्जमा थप ४ वटा गैँडा फागुन मसान्त भित्र ल्याइने निकुञ्जले जनाएको छ ।

रेडियो कलर जडान गरिएको गैँडा बर्दियामा पहिलो पटक स्थान्तरण गरीएको राष्टिय प्रकृति संरक्षण कोष बर्दियाका प्रमुख अम्बिका प्रसाद खतिवडाले बताए ।

बर्दिया निकुञ्जको बबई उपत्यकामा झण्डै ६ सय हेक्टर घाँसेमैदान गैँडाका लागि व्यवस्थापन गरिएको र १० वटा पानीका घोल समेत निर्माण गरिएको छ ।

बबई क्षेत्रमा जाने बाटो समेत नभएकाले हाल ६५ किलोमिटर वन पथ निर्माण गरिएको छ ।

सुरक्षाको जिम्मा लिएको नेपाली सेनाले बबई क्षेत्रमा १२ वटा सुरक्षा पोष्ट स्थापना गरेको छ ।

बर्दिया निकुञ्जमा हाल गैंडाको संख्या २९ पुगेको छ ।

यसअघि सन् १९८६ देखि सन् २००३ सम्म १७ वर्षको अवधिमा पटकपटक गरी चितवन निकुञ्जबाट ७० वटा गैंडा बबईमा र १३ वटा गैंडा कर्णाली नदी तटीय क्षेत्रमा गरी ८३ वटा गैंडा बर्दिया निकुञ्जमा स्थान्तरण गरीएको थियो ।

जसमध्ये माओवादी हिंसाका बेला ३६ वटा गैंडा चोरी शिकार र २४ वटा गैंडा कालगतिले मरेका थिए ।
शब्द/तस्वीरः भावुक योगी, बर्दिया

प्रतिकृया दिनुहोस