नेपाली कांग्रेसका नवनिर्वाचित सभापति शेरबहादुर देउवाले न्यायपरिषदले गरेको सिफारिस फिर्ता गरेर सभामुख ओनसरी घर्ति मगरले गल्ती गरेको बताएका छन् ।

रिपोर्टर्स क्लब नेपाललेकोे साक्षात्कारमा उनले भने, “सभामुखले फिर्ता पठाउने होईन, सुनवाई समिति बनाउने हो । फिर्ता गर्नु परे पनि सुनवाई समितिले गर्छ ।”

न्यायाधीश सिफारिस सभामुखलाई चित्त बुझ्नु वा नबुझ्नुको अर्थ नरहने भन्दै उनले सभामुख सम्मानित र तटस्थ पद भएकाले सबैको साझा र अभाभावकीय भूमिकामा रहनुपर्ने बताए ।

उनले सभामुख घर्ती असल मान्छे भएको तर, सिफारिस फिर्ता प्रकरणमा कसैले उनलाई फसाएको हुनसक्ने दाबी गरे । उनले यसबारे एमाओवादी अध्यक्ष पुष्पकमल दाहालसँग कुरा गर्ने बताएका छन् ।

ओली सरकार आफ्नै बोझले ढल्छ
उनले केपी शर्मा ओली नेतृत्वको सरकार आफ्नै बोझले ढल्ने भन्दै वर्तमान सरकारमा कांग्रेस सहभागी नहुने बताए ।

“सशक्त प्रतिपक्ष नभए शासक तानाशाही हुन्छ । गलत विपक्षी भए प्रजातन्त्र कमजोर हुन्छ । दह्रो प्रतिपक्ष भए प्रजातन्त्र बलियो हुन्छ । त्यसैले हामी प्रतिपक्षमा बस्छौ । यो सरकारमा हामी जाँदैनौ ।”

आफ्नो उद्देश्य संघीय लोकतान्त्रिक गणतन्त्रलाई बलियो बनाउने भएको भन्दै उनले संविधानको कार्यान्वयन, सीमांकन मिलाउने र मुलुकमा लगानीको वातावरण बनाएर समृद्ध र सम्पन्न नेपाल बनाउने आफ्नो प्राथमिकता रहेको सुनाए ।

देउवाले भने, “अहिले महंगी छ, कालोबजारी छ, आपूर्ति अस्तब्यस्त छ । त्यसविरुद्ध कांग्रेसले संसदमा आवाज उठाउँछ । मंहगी, कालोबजारी रोक्ने सरकारलाई दबाव दिन्छ ।”

उनले मधेशी मोर्चाले उठाएको सीमांकनसहितका मुद्दाहरुलाई बार्ताबाटै समाधान गर्ने स्पष्ट पार्दै आवश्यक परे संविधान संसोधन समेत गर्न सकिने बताए ।

देउवाले भने, “हामीसँग एक्लै संविधान संसोधन गर्ने संख्या छैन । त्यसकोलागि दुई तिहाई चाहिन्छ । अन्यदलहरुसँग पनि छलफल गरेर सहमति कायम गर्न पहल गर्छु ।”

प्रतिकृया दिनुहोस