पूर्वराष्ट्रपति डा. रामवरण यादवले अबका दिनमा आफू चुरे संरक्षण अभियानका साथै मधेशी र पहाडीबीचकोे सम्बन्ध सुदृढ पार्नेतर्फ केन्द्रित हुने बताएका छन् ।

विराटनगरमा ५ चैतमा संचारकर्मीसँग कुरा गर्दै यादवले राष्ट्रिय एकता,  पहाडी–मधेशीबीचको सम्बन्ध सुद्धढिकरण र वातावरणलगायतका विषयमा सर्वसाधारणलाई जानकारी गराउन लागिपर्ने बताएका हुन् ।

७ दशकको संघर्षपछि जनताका छोराछोरीले लेखेको संविधान आएकाले यसको कार्यान्वयनका लागि सबै एकजुट हुन उनले आग्रह गरे ।

संविधानमा त्रुटी भए सच्याउन सकिने भन्दै मधेशकेन्द्रित दलले उग्रता नदेखाई लोकतान्त्रिक विधिअनुरुप माग राख्न र सरकारलाई असहिष्णु नहुन यादवले सुझाव दिए ।

संविधान मानेरै सुशील कोइरालालाई प्रधानमन्त्री पदका लागि भोट हालेका मधेशकेन्द्रित दलहरुलाई समेटेर स्थानीय र प्रान्तको निर्वाचन गराउनु जरुरी रहेको उनले बताए ।

“आन्दोलनकारी र सरकार दुबै असहिस्णु हुनु भएन, नाकामा बसिदिनु भएन” उनले भने, “यो संविधानले राष्ट्रिय एकता र साम्प्रदायिक सद्भाव बनाउने अवसर दिएको छ ।”

मधेश आन्दोलनको पाँच महिनामा नेपाललाई खर्बाैंको क्षति भएको बताउँंदै पूर्वराष्ट्रपति यादवले आन्दोलनकारीलाई अतिबादको बाटो नलिन सुझाव दिए ।

संविधान संशोधनपछि मधेशकेन्द्रित दलहरुको ९५ प्रतिशत माग पूरा भइसकेको भन्दै उनले सीमाङ्कन संशोधनका लागि अर्थशास्त्र, राजनीति, भुगोललगायतका विज्ञको सहयोगमा प्रदेशहरुको सीमाङ्कन गरिनुपर्ने बताए । भने, “प्रान्तको सीमा उत्तर–दक्षिण की पूर्व–पश्चिम बनाउने हो विज्ञहरुको सल्लाह अनुसार हुनुपर्छ, राजनीतिक रुपले मात्रै हुँदैन ।”

आफूलाई मुलुकको उच्च पदमा पुगिसकेको मधेशी भन्दै उनले पहाडमा बस्न मनपर्ने जानकारी दिए । “जनकपुरको घर बेचेर सिन्धुलीमा बसौंकी जस्तो लागेको छ,” यादवले भने ।

विराटनगर र झापामा एक रात बस्न समस्या हुने तर, धनकुटा र इलाममा जाँदा त्यही बस्न मन लाग्ने गरेको यादवले बताए ।

कमल रिमाल, बिराटनगर

प्रतिकृया दिनुहोस