बाराको पथलैयामा रहेको केन्द्रीय मेडिकल स्टोर्समा ७ चैतमा भिषण आगलागी भएको छ । आपूर्ति व्यवस्था महाशाखा अन्तर्गत रहेको स्टोर्समा भएको आगलागीका कारण करोडौंको क्षति भएको छ ।

आगलागीबाट करौडौंका औषधि र भवन जलेर नष्ट भएको छ । पर्सा वन्यजन्तु आरक्षको जङ्गल क्षेत्रमा रहेको गोदाममा जंगलबाट आएको आगोका कारण आगलागी भएको हुन सक्ने प्रहरीको अनुमान छ ।

विहान ९ बजे तिर शुरु भएको आगलागी ६ घण्टा पछि नियन्त्रणमा आएको थियो ।

वीरगञ्ज उपमहानगरपालिकाका २ वटा, कलैया नगरपालिकाको १ र हेटौडा उपमहानगरपालिकाको १ गरी ४ वटा बारुण यन्त्र, दुईवटा डोजर सहित नेपाल प्रहरी, सशस्त्र प्रहरी र स्थानीय वासिन्दाको सहयोगमा आगो नियन्त्रणमा लिईएको थियो ।

आगलागी भएको गोदाम नं. ७ मा ग्लोबल फण्ड, युनिसेफ, एसडिएफबाट अनुदान प्राप्त र नेपाल सरकारले खरिद गरेको विशेष झुल, कण्डम, किटनाशक औषधि, एडि सिरिञ्ज, इजि पेष्ट(लिटोको पिठो), कपास, हात्ती पाईलेको औषधिहरु पूर्णरुपमा जलेर नष्ट भएको बरिष्ठ जनस्वास्थ्य अधिकृत अरुणकुमार झाले बताए ।

आगलागी कसरी भयो र त्यसबाट कति क्षति भयो भन्ने विषयमा अनुसन्धान भईरहेको इलाका प्रहरी कार्यालय, सिमराका प्रहरी निरीषक पुरुषोत्तम खड्काले बताए ।

पथलैयामा विभागका ७ वटा गोदाम छन् । जसबाट देशको ७५ वटै जिल्लाका जनस्वास्थ्य कार्यालयका लागि दातृ निकायबाट अनुदान प्राप्त तथा नेपाल सरकारद्वारा खरिद गरिएको औषधि गोदाम गरी देशभर पठाउने गरिन्छ ।

सुरेश बिडारी, वीरगञ्ज

प्रतिकृया दिनुहोस