जनकपुरमा एक दिनअघि अपहरित बालक मृत अवस्थामा फेला परेका छन् ।

६ चैतमा अपहरणमा परेका जनकपुर–२६ का असलम राईनका छोरा ५ वर्षीय छोरा अशरफ राईनको शव ७ चैत विहान घर नजिकैको गहुँखेतमा फेला परेको प्रहरीले जनाएको छ ।

बालक वेपत्ता भएपछि उनी अपहरणमा परेको हुनसक्ने भन्दै परिवारले हिजै जिल्ला प्रहरी कार्यालय धनुषामा जानकारी गराएको थियो ।

प्रहरीले घटनालाई गम्भीररुपमा नलिई सामान्य टिपोट गरी आफूहरुलाई घर फर्कन लगाएको आफन्तले गुनासो गरेका छन् ।
यसअघि जनकपुर–१४ रजौलका १३ वर्षीय रितेश मिश्रको अपहरण भएको थियो ।

अपहरितको परिवारले किटानी जाहेरी सहित उजुरी दिन खोज्दा प्रहरीले अस्वीकार गरेपछि पीडित परिवारले बाटो अवरोध गरेर विरोध प्रदर्शन गर्नुपरेको थियो ।

बालक मिश्र अझै फेला परेका छैनन् । न त प्रहरीले नै उनको अपहरण सम्बन्धी जाहेरी दर्ता गरेको छ ।

जाहेरीमा जिल्ला प्रहरी कार्यालयमा कार्यरत प्रहरीकै आफन्तका नाम भएकोले प्रहरीले जाहेरी दर्ता नगरेको परिवारले बताएको छ ।
ईश्वरचन्द्र झा, जनकपुर

प्रतिकृया दिनुहोस