भारतको नयाँदिल्लीबाट काठमाडौं अवतरण भएको जेट एयरको विमानमा बम रहेको हल्लापछि खोजतलासी गर्दा त्यस्तो केही नभेटिएको प्रहरीले जनाएको छ ।

आज, १४ चैत अपराह्न त्रिभुवन अन्तर्राष्ट्रिय विमानस्थलमा उक्त विमानमा बम रहेको भन्दै विमानस्थलमा अज्ञात व्यक्तिको फोन आएपछि जाँच गरिएको तर विमानमा केही फेला नपरेको महानगरीय प्रहरी कार्यालयका आयुक्त प्रहरी अतिरिक्त प्रहरी महानिरीक्षक प्रतापसिंह थापाले जानकारी दिए ।

उनले सबै यात्रुलाई विमानबाट ओरालेर जाँच गरिएको र हालसम्म कुनै शङ्कास्पद वस्तु फेला नपरेको बताए ।

अपराह्न ४ः३० बजे अवतरण भएको उक्त विमानमा बम रहेको हल्लापछि विमानस्थलमा अवतरणको क्रममा रहेका राष्ट्रिय र अन्तर्राष्ट्रिय विमानहरुले मार्ग परिवर्तन गरेका थिए भने उड्न तयार रहेका विमानहरु रोकिएका थिए ।

विमानस्थलको अवस्था सामान्य भएपछि अहिले उडानरअवतरण नियमित भएको छ ।

प्रतिकृया दिनुहोस