नेपाली कांग्रेस संसदीय दलको नेताको निर्वाचन २४ चैतमा हुने भएको छ ।

निर्वाचन समितिको आज संसदीय दलको कार्यालय सिंहदरबारमा बसेको बैठकले मनोनयन दर्ता २३ चैतमा र निर्वाचन २४ चैतमा गर्ने निर्णय गरेको हो ।
मिति आजै तोकिए पनि समय भने भोलि बस्ने बैठकले तय गर्ने समितिका सदस्य सुरेन्द्र पाण्डेले जानकारी दिए ।

संसदीय दल कार्यसमितिको निर्वाचन भने २६ चैतमा हुनेछ ।

यसको लागि मनोनयन दर्ता गर्ने मिति २५ गतेलाई तोकिए पनि समय भने सोमबारकै बैठकले निर्धारण गर्ने समितिले जनाएको छ ।

निर्वाचन कार्यक्रम संसदीय दलको कार्यालय सिंहदरबारमा हुनेछ ।

संसदीय दलको निर्वाचन सम्पन्न गर्न कांग्रेस केन्द्रीय समितिको बैठकले सांसद एवम् कांग्रेस नेता रमेश रिजालको संयोजकत्वमा केन्द्रीय सदस्यद्वय पाण्डे र गुरुराज घिमिरे सदस्य रहेको तीन सदस्यीय निर्वाचन समिति गठन गरेको थियो ।

बैठकले कांग्रेस संसदीय दलको विधान नयाँ संविधानबमोजिम संशोधनका लागि केन्द्रीय समितिमा लेखी पठाउने निर्णय पनि गरेको छ । रासस

प्रतिकृया दिनुहोस