मिस नेपाल युएस २०१३ की विजेता वर्तिका राई गीति संग्रह बिम्बाकाश लिएर सांगीतिक आकाशमा देखिएकी छन् । अल्बममा उनी आफैंले लेखेका र संगीत भरेका ६ वटा गीत छन् । राईले फागुनको अन्तिम साता न्यूयोर्कबाटै अल्बम सार्वजनिक गरेकी हुन् ।

त्यसो त उनले सात वर्षको उमेरमै काठमाडौंको बूढानीलकण्ठ स्कूलको कार्यक्रममा पहिलोपल्ट गाएकी थिइन् । एसएलसीपछि उनले गुरुदेव कामतसँग आधुनिक गायन कलाको प्रशिक्षण लिइन् । श्रुति प्रधानसँग पश्चिमा संगीतको औपचारिक ज्ञान समेत हासिल गरिन् । पछिल्लो समय अमेरिकामा बस्दै आएकी राईले अहिले १९७४ एडीका पूर्व सदस्य फिरोज स्याङ्देनसँग सिकिरहेकी छिन् ।

जर्जियास्थित वेस्लेयन कलेजमा वाणिज्य संकायकी विद्यार्थी उनी आफ्ना सबै गीत यथार्थपरक रहेको बताउँछिन् । “कल्पनाशीलता भन्दा वास्तविक पात्र वा घटनालाई गीतमार्फत उन्ने प्रयत्न गरेकी छु”, उनी भन्छिन् । अल्बमको शीर्ष गीत बिम्बाकाशको म्युजिक भिडियो युट्यूबमा २ लाख ५० हजार पटक भन्दा बढी हेरिसकिएको छ ।

-प्रशान एलुङ राई

प्रतिकृया दिनुहोस