नेपाल बार एशोसिएसनको २४ औं कार्यसमिति निर्वाचनमा उपप्रधानमन्त्री भीम रावलसहित चार जना बाहालवाला मन्त्रीले मतदान गरेका छन् । कानून, न्याय तथा संसदीय मामिला मन्त्री अग्नी खरेल, शिक्षामन्त्री गिरिराजमणि पोखरेल र उद्योगमन्त्री सोमनाथ पाण्डेले पनि २० चैतमा भएको बार निर्वाचनमा मतदान गरेका छन् ।

२५ सदस्यीय कार्यसमितिका लागि ७१ जनाबीच भएको प्रतिष्पर्धामा पूर्व सभामुखहरु सुवासचन्द्र नेम्वाङ, तारानाथ रानाभाट र दमननाथ ढुङ्गानाले पनि मतदान गरेका छन् । त्यस्तै पूर्व परराष्ट्रमन्त्री महेन्द्रबहादुर पाण्डे, सभासदहरू भानुभक्त ढकाल, पुष्पा भुसाल, रामनारायण बिडारीलगायतले पनि भोट खसालेका छन् । राजनीतिमा सक्रिय भए पनि बार काउन्सिलमा ‘कानून व्यवसायी’ को रुपमा दर्ता भई लाइसेन्स नवीकरण गराउँदै आएकाले उनीहरू पनि मतदाता बनेका हुन् ।

देशभर ९ हजार ५२२ मतदाता रहेकोमा ७ हजार ८४५ ले मात्र मतदान गरेको प्रमुख निर्वाचन अधिकृत हरिशङ्कर निरौलाले जानकारी दिए ।
निर्वाचनले आगामी तीन वर्षका लागि एक अध्यक्ष, सात उपाध्यक्ष, महासचिव, कोषाध्यक्ष र १५ सदस्य गरी २५ सदस्यीय नयाँ कार्यसमिति चयन गर्नेछ ।

राजनीतिक दलहरूसँग निकट रहेका कानून व्यवसायीहरू प्यानलै बनाएर चुनावमा लागेका थिए । एमाले, एमाओवादी, राप्रपा नेपाल निकट कानून व्यवसायीको समूहबाट विजयकान्त मैनाली तथा नेपाली कांग्रेस निकटका कानून व्यवसायीको समूहबाट शेरबहादुर केसी अध्यक्षका उम्मेदवार छन् । त्यस्तै मधेशकेन्द्रित दल निकट रहेका अधिवक्ता मनोहर साह र नेमकिपा निकटका अधिवक्ता रामप्रसाद प्रजापतिले पनि अध्यक्षमा उम्मेदवारी दिएका छन् ।

देशभरका मतदान केन्द्रबाट २२ चैत साँझसम्म मतपेटिका काठमाडौँ आइपुग्ने भएकाले त्यसपछि मात्रै गणना शुरु हुनेछ ।

तुफान न्यौपाने
बारलाई साझा बनाउँछुः मैनाली, सक्रिय बनाउँछुः केसी

प्रतिकृया दिनुहोस