जाजरकोटको सरस्वती उमावि केन्द्रबाट एसएलसी परीक्षामा सहभागी एक छात्राले परीक्षा दिंदै गर्दा छोरी जन्माएकी छन् । परीक्षाका बेला जन्मिएकी छोरीको नाम पनि परीक्षा राखिएको छ ।

२१ चैतमा अनिवार्य गणितको परीक्षा दिंदादिंदै परीक्षार्थी गीता बुढालाई ब्यथा लागेपछि केन्द्रकै शिक्षिकाहरुले उनलाई सुरक्षित स्थानमा लगेर स्याहार गरेको केन्द्राध्यक्ष शत्रुधनप्रसाद चौधरीले जानकारी दिए ।

भर्खरैकी सुत्केरी गीताले परीक्षा दिन भने छोडिनन् । बच्चा जन्माएको केही बेरमै उनले सोही विद्यालयकी कक्षा ९ की छात्रा कमला रेग्मीको सहयोगले परीक्षा दिएको केन्द्राध्यक्ष चौधरीले बताए ।

अहिले आमा र छोरीको अवस्था सामान्य रहेको छ ।

जाजरकोटमा एसएलसी दिनुअघि नै अघिकांश छात्राको विवाह भइसकेको हुन्छ । १८ बर्ष मुनिका ६० प्रतिशत किशोरीले विवाह गर्ने गरेको महिला तथा बालबालिका कार्यालयको तथ्यांकमा उल्लेख छ ।
राजेन्द्र कार्की, जाजरकोट

प्रतिकृया दिनुहोस