संस्कृति, पर्यटन तथा नागरिक उडड्यनमन्त्री आनन्दप्रसाद पोखरेलले आगामी बुद्ध जयन्तीका अवसरमा हुने विशेष समारोहमा भारतका प्रधानमन्त्री मोदीलाई निमन्त्रणा दिन आफू भारत भ्रमणमा जाने बताएका छन् । पोखरेलले २१ चैतमा चरिकोट मिडिया फाउन्डेसनले आयोजना गरेको पत्रकार भेटघाट कार्यक्रममा यस्तो जानकारी दिएका हुन ।

नेपालको पर्यटन प्रवद्र्धन गर्दै आर्थिक विकास गर्न सरकारले सात प्राथमिकता निर्धारण गरेर अगाडि बढेको भन्दै पोखरेलले आफू प्रधानमन्त्री केपी शर्मा ओलीको सल्लाह बमोजिम नै भारतीय प्रधानमन्त्री मोदीलाई निम्ता गर्न भारत जान लागेको बताए । भारत भ्रमणको मिति भने तय भइनसकेको उनको भनाई छ ।

उनले नेपालमा साहसिक पर्यटनसँगै सांस्कृतिक एवम् प्राकृतिक पर्यटनलाई प्रवद्र्धन गर्न तीर्थयात्रा पर्यटनलाई सरकारले प्राथमिकतामा राखेको उल्लेख गरे ।

मन्त्री पोखरेलले पर्यटन विकासका लागि हवाई सेवाको भरपर्दो विकास आवश्यक रहेको उल्लेख गर्नुहुँदै सरकारले पोखरा अन्तर्राष्ट्रिय विमानस्थल, विश्वकै ठूलामध्येमा पर्नसक्ने निजगढ विमानस्थल र गौतमबुद्ध विमानस्थललाई प्राथमिकतामा राखेर काम अगाडि बढाए उल्लेख गरे ।रासस

प्रतिकृया दिनुहोस