काठमाडौँ उपत्यका खानेपानी लिमिटेडले दैनिक चार करोड लिटर पानी उत्पादन गर्ने गरी ४० वटा गहिरो ट्युबवेल खन्न शुरु गरेको छ ।

सुख्खायामको आरम्भसँगै उपत्यकामा खानेपानीको अभाव हुन थालेपछि जमिनभन्दा २५० मिटर तलबाट पानी निकाल्ने गरी ट्युबवेल खन्न शुरु गरिएको लिमिटेडका प्रवक्ता मिलनकुमार शाक्यले जानकारी दिए ।

“उपत्यकामा दैनिक ३७ करोड लिटर पानीको माग भएकामा सुख्खायाममा नौ करोड लिटर र वर्षात्मा १५ करोड लिटर पानीमात्र उत्पादन हुन सकेको छ, उपत्यकाका विभिन्न भागमा आठ दिनदेखि १३ दिनको फरकमा मात्र पानी वितरण गर्न सकिएको छ, यो समस्याबाट समाधानका लागि गहिरो ट्युबवेल खन्न शुरु गरिएको हो” – उनले भने ।

उपत्यकामा वितरण गरिएको खानेपानीको पाइपलाइन १०० वर्ष पुरानोसम्म भएकाले उपत्यकामा ४० प्रतिशत पानी खेर गएको पनि लिमिटेडले जनाएको छ ।

लिमिटेडको आयोजना कार्यान्वयन निर्देशनालयले निर्माण गरिरहेका ४० वटा ट्युबवेलमध्ये १५ वटा पूर्ण रुपमा, पाँचवटा आंशिक रुपमा सम्पन्न भएको, १० वटा निर्माणीधन अवस्थामा र १० वटामा जग्गा विवादका कारण काम अघि बढ्न नसकेको प्रमुख तिरेशकुमार खत्रीले जानकारी दिए ।

अधिकार सम्पन्न बाग्मती सभ्यता एकीकृत विकास समितिले उपलब्ध गराएको जग्गामा ट्युबवेल खन्दा पानीको स्रोत सुक्ने भन्दै स्थानीयवासीले विरोध गरेपछि १० वटामा काम हुन नसकेको उनले बताए ।

प्रतिकृया दिनुहोस