अभियुक्त मिनबहादुर विश्वकर्मा

ब्यापार व्यवसाय सञ्चालन गर्न साथीलाई दिएको पैसाकै कारण पाँचथरका व्यवसायी दिनेश रेग्मीले ज्यान गुमाउनु परेको तथ्य प्रहरीले सार्वजनिक गरेको छ ।

झापा लखनपुर– १ घर भई पाँचथरको रबि बजारमा सुन पसल गर्ने मिनबहादुर विश्वकर्माले १ चैतमा आफ्नै साथी रेग्मीको हत्या गरेको प्रमाणसँगै अभियुक्तलाई प्रहरीले सार्वजनिक गरिसकेको छ ।

विश्वकर्माले रेग्मीबाट सुन कारोबार गर्नका लागि करिब रु ५० लाख रुपैयाँ ऋण लिएको र त्यो तिर्न नसक्दा रेग्मीकै हत्या गरेको प्रहरीले जनाएको छ ।

इलामको फुयतपा– ५ घर भइ रबि बजारमा फोनको रिजार्ज कार्ड र डिस होमको कारोबार गर्दै आएका रेग्मी र रबिमै सुन पसल गरेका विश्वकर्माबीच रहँदाबस्दा मित्रता झांगिएको थियो ।

ब्यवसायका लागि भन्दै केही समयका लागि विश्वकर्माले रेग्मीसँग रु ५० लाख ऋण लिए, नजिकको साथीले मागेको भन्दै विश्वासमा परेर रेग्मीले पनि ऋण सजिलै दिए । तर, विश्वकर्माको ब्यापार फस्टाउन सकेन उनी ऋण तिर्न नसक्ने अवस्थामा पुगे ।

साथीलाई ऋण तिर्न नसकेपछि उसको हत्या गरे कहिल्यै तिर्नु नपर्ने विचार आएपछि अन्य दुई व्यक्तिको सहयोगमा रेग्मीको हत्या गरेको उनले प्रहरीलाई बयान दिएका छन् ।

पाँचथरका प्रहरी प्रमूख कृष्णप्रसाद कोइरालाका अनुसार सप्तमी बजारमा विग्रेको डिस होम मर्मतका लागि भन्दै झुठो फोन गरेर बोलाई बाटोमा पर्ने राउते जंगलमा १ चैतमा रेग्मीको हत्या भएको थियो ।

दिनेश रेग्मी जसको हत्या आफ्नै साथीले गरे ।

कोइरालाका अनुसार रेग्मीको हत्यामा संलग्न रहेका थप २ जना ब्यक्तिहरु फरार छन । अनुसन्धानमा प्रभाव पर्ने भएकाले उनीहरुको नाम पनि गोप्य राखिएको छ ।

हत्याको आशंकामा प्रहरीले विश्कर्मालाई १८ चैतमा काठमाडौंबाट पक्राउ गरेको थियो ।

घर ब्यबहार लगायत बिबिध कारणले व्यवसाय चलाउन गाह्रो परिरहेकोले ऋणबाट मुक्त हुनका लागि साथीसंग सल्लाह गरी रेग्मीको हत्या गरेको अभियुक्त बिश्वकर्माले स्वीकारेका छन् ।

लक्ष्मी गौतम, पाँचथर

प्रतिकृया दिनुहोस