पश्चिम जाजरकोटको दसेरामा झाडापखालाको प्रकोप फैलिएको छ ।

जनप्रिय उच्च मावि दसेरा एसएलसी परीक्षा केन्द्रका एक निरीक्षक सहित परीक्षा दिईरहेका १८ जना विद्यार्थी र ४२ भन्दा बढी स्थानीयमा झाडापखाला देखिएको हो ।

पखालाबाट लक्ष्मी मावि अन्दरकोटका शिक्षक अम्मर बिसी सहित १८ जना परीक्षार्थी बिरामी परेको केन्द्राध्यक्ष शेरबहादुर अधिकारीले बताए ।
सोमवार अनिवार्य विज्ञान विषयको परीक्षा दिने क्रममा विद्यार्थीलाई पखाला लागेपछि परीक्षाकेन्द्रमै स्वाथ्यकर्मी बोलाएर उपचार गरिएको उनले बताए ।

विद्यार्थीले उपचार गर्दै परीक्षा दिइरहेका छन् । शौचालय जाँदै जीवनजल पिउदै परीक्षा दिने गरेको बाल उच्च मावि झाप्राका छात्र भीमबहादुर थापाले टेलिफोनमा बताए ।

उनले विरामी भएका कारण राम्रोसँग लेख्न नसकेको बताए । बिरामी परेका अधिकांश विद्यार्थीको हालत त्यस्तै छ ।

रामोदय मावि जेवा दशेराका ३, लक्ष्मी मावि अन्दरकोटका ३, बाल उच्च मावि झाप्राका ९ र सरस्वती मावि सीमाका ३ गरी १८ जना विद्यार्थी पखालाले थला परेको केन्द्राध्यक्ष अधिकारीले बताए ।

५ ओटा विद्यालयबाट परीक्षा दिन आएका ५२१ जना विद्यार्थी र निरीक्षकहरु समेत दशेर विद्यालय नजिकै बस्छन् । त्यती धेरै संख्यामा मानिसहरु भेला भएको ठाउँमा शौचालयको उचित व्यवस्था छैन । न त खाने पानी नै स्वस्थ्यकर छ ।

दशेरामा सरसफाईमा ध्यान नदिदा झाडापखाला फैलिएको स्थानीय बताउँछन् ।

परीक्षा दिंदै गरेका विद्यार्थीहरु पखलाले सताएपछि ५ पटकसम्म कक्षाबाट बाहिरिनु परेको भन्दै उनले परीक्षा केन्द्र र त्यसवरपर खानेपानीको ठूलोसमस्या भएको बताए ।

“विद्यार्थीलाई नआत्तिन र पानी उमालेर खान सल्लाह दिएका छौं,” उनले भने ।

आइतवार स्थानीय तथा विद्यार्थी गरी २२ जना र सोमवार थप ३९ जना पखालाका विरामीको उपचार गरिएको दसेरा स्वास्थ्य चौकीका ईन्चार्ज स्वास्थ्य सहायक नविना कडेलले जानकारी दिइन ।

विरामी ३९ मध्ये ९ जना बालबालिका छन् ।

त्यस्तै भाइरल ज्वरोका विरामी ३० जनाले उपचार गराएको उनले बताईन् । “विरामीमा अपच, झाडावान्ता र भाइरल ज्वरो देखा परेको छ,” उनले भनिन् ।

जाजरकोटमा झाडा पखालादेखि स्वाइनफ्लू सम्मको महामारी बेलाबेला फैलिरहन्छ ।

गत वर्ष एसएलसी परीक्षा केन्द्र टालेगाँउबाट फैलिएको स्वाईनफ्लुले महामारीको रुप लिँदा २७ जनाको ज्यान गएको थियो ।

२०६६ सालमा फैलिएको झाडापखालाले महामारीको रुप लिदा २ सय बढी जाजरकोटवासीको ज्यान गएको थियो भने महामारी मध्य तथा सुदुर पश्चिमाञ्चलसम्म फैलिएको थियो ।
राजेन्द्र कार्की, जाजरकोट

प्रतिकृया दिनुहोस