सञ्जय साह

जनकपुरका सञ्चार उद्यमी अरुण सिंघानियाको हत्यामा निलम्बित सांसद एवम् सदभावना पार्टी उपाध्यक्ष सञ्जय साहको संलग्नता रहेको धनुषा प्रहरीले जनाएको छ ।

मिथिला राज्यको माग गर्दै जनकपुरको रामानन्द चोकमा धर्नामा बसेकाहरुमाथि बम विष्फोट गराएर हत्या गरेको अभियोगमा जेल सजाए भोगिरहेका साहलाई सिंघानिया हत्याको समेत आरोप लागेपछि जनकपुर ल्याइएको छ ।

२२ चैत रातिदेखि जिल्ला प्रहरी कार्यालय धनुषामा राखिएका साहसँग प्रहरीले बयान लिइरहेको छ ।

सिंघानिया हत्याका अभियुक्त चन्द्रदीप यादवलाई गत साता प्रहरीले पक्राउ गरेपछि यादवको बयानका आधारमा साहको संलग्नता रहेको खुलेको हो ।

सिंघानियाको हत्याको प्रमुख योजनाकार साह नै रहेको निस्कर्ष प्रहरीले निकालेको जिल्ला प्रहरी कार्यालय धनुषा स्रोतको दाबी छ ।

अरुण सिंघानिया

स्रोतका अनुसार साहका विरुद्ध जनकपुर टूडे पत्रिकामा प्रकाशित समाचार र साहले सस्तो दाममा फुत्काउन खोजेको जग्गा जनकपुर टुडेका तात्कालीन प्रकाशक सिंघानियाँका कारण हात नपरेपछि उनले सिंघानीयाको हत्या गराएका हुन् ।

सिंघानियाका छोरा राहुलले भने समाचारकै कारण आफ्ना बाबुको हत्या भएको कुरा पत्याउन गाह्रो भएको बताए ।

जिल्ला प्रहरी कार्यालय धनुषाले आज, २४ चैतमा पत्रकार सम्मेलन गरी सिंघानियाको हत्या प्रकरण र त्यसमा साहको संलग्नाता बारे यथार्थ जानकारी दिने बताएको छ ।

१७ फाल्गुन २०६६ मा सञ्चार उद्दमी सिंघानियाको जनकपुरको शिवचौकमा हत्या गरिएको थियो ।

ईश्वरचन्द्र झा, जनकपुर

प्रतिकृया दिनुहोस