आफ्नो मञ्जुरी बिना अभिभावकहरुले भारतीय युवकसँग विवाह गरिदिन थालेपछि वीरगञ्जकी किशोरीले परिवारसँग विद्रोह गरेकी छन् ।

माइती नेपाल, वीरगञ्जमा रिंकु ठाकुर (बीचमा)

वीरगञ्ज छप्कैया–१ सिसौबारीकी १७ वर्षीया रिंकुको विवाह भारतको घोडासनका युवकसँग १३ वैशाखमा हुने तय भइसकेको थियो ।

परिवारले आफ्नो मञ्जुरीबिना ७ कक्षा पढेका भारतका युवकसँग विवाह गरिदिन लागेपछि त्यसविरुद्ध रिंकुले दुई महीनाअघि प्रहरीमा उजुरी गरिन् ।

१२ कक्षामा पढदै स्थानीय रेडियोमा समाचार वाचनसमेत गर्ने रिंकुले आफ्नो पढाई र उमेर विवाहयोग्य नभएकाले केही वर्ष पर्खन भन्दै विन्तिभाउ गर्दा पनि परिवारले बिहे गर्नै पर्ने बताएपछि उनी प्रहरीको सहयोग लिन पुगेकी हुन् ।

प्रहरीले उनका बाबु नागेन्द्र ठाकुरलाई बोलाएर सम्झाईबुझाई गर्दा पनि केही नलागेपछि रिंकुले माइती नेपालमा गुहार लगाइन् ।

त्यसले पनि केही नलागेपछि उनी केही साथीहरुलाई लिएर प्रहरी उपरीक्षक राजुबाबु श्रेष्ठसँग सहयोग माग्न गइन् । श्रेष्ठले उनका अभिभावकलाई बोलाएर सम्झाई बुझाई गर्दा उनीहरु अहिले बिहे नगरिदिने समझदारीमा पुगे ।

तर, घर पुगेपछि रिंकुलाई रेडियोमा जानबाट रोक्ने र कुटपीट गर्दै जसरी भएपनि विवाह गरिदिने बताएपछि उनले पुनः प्रहरीसँग सहयोग मागिन् । अहिले प्रहरीले रिंकुलाई माइती नेपालको संरक्षणमा पठाएको छ ।

“मेरो अझै पढ्ने मन छ तर, घरमा बिहे गर्नै पर्ने दबाब छ । कुटपीट समेत गर्न थालेपछि घर छोडें,” रिंकु भन्छिन् ।

रिंकुको हेरचाह र सम्पूर्ण खर्च माईती नेपालले नै बेहोर्ने माईती नेपाल वीरगञ्जकी प्रमुख संगीता पुरीले बताएकी छन् ।

तराईमा सानै उमेरमा, छोरीको मञ्जुरी बिनानै बिबाह गरिदिने चलन रहेकोमा रिंकुको विद्रोहले चेतना फैलाउने काम गरेको उनको धारणा छ ।

प्रहरी नायब उपरीक्षक होविन्द्र बोगटी पनि रिंकुको कदमको प्रशंसा गर्दै उनलाई आवश्यक सहयोग गरिएको बताउँछन् ।

-सुरेश बिडारी, वीरगञ्ज

प्रतिकृया दिनुहोस