पुनर्वास भएका भुटानी शरणार्थीको छैठौं सम्मेलन अमेरिकाको ओहायो राज्यमा आगामी जुलाई महीनाको दोस्रो साता हुने भएको छ ।

ओहायोको सिन्सीनाटीमा ८—१० जुलाईमा हुने सम्मेलनमा अमेरिकाका ३० राज्यमा रहेका एकहजार बढी भुटानी शरणार्थी सहभागी हुने छन् ।

सम्मेलनमा राष्ट्रसंघीय शरणार्थी आयोगका अधिकारीहरु समेत आमन्त्रित रहेको आयोजक अर्गनाइजेसन अफ भुट्निज कम्युनिटीज् इन अमेरिकाका अध्यक्ष डिबी राईले बताए ।

सम्मेलनमा भुटानी शरणार्थी समाजको सामाजिक तथा साँस्कृतिक जीवनका बद्लिँँदा पक्षहरुलाई केलाइनेछ ।

सम्मेलनमा एकलाख बढी भुटानी शरणार्थी पुनर्बास भएका अवसरलाई बिशेष उत्सवको रुपमा लिइने बताइएको छ ।

सन् २००८को शुरुदेखि मानवीय सहायता स्वरुप झापा र मोरङका सात शिबिरका भुटानी शरणार्थीलाई अमेरिका लगायतका आठ मुलुकमा पुनर्बास गर्न थालिएको हो ।

हालसम्म १ लाख १ हजार ६५२ शरणार्थी नेपालबाट अमेरिका र युरोपेली मुलुकमा पुनर्वास भएका छन् । तीमध्ये ८८ प्रतिशत अमेरिका पुगेका छन् ।

शरणार्थी पुनर्वास भएका अन्य मुलुकमा क्यानाडा, डेनमार्क, नेदरल्याण्ड, नर्बे, न्युजिल्याण्ड, बेलायत र अष्टे«लिया छन् ।
गोपाल गडतौला, झापा

प्रतिकृया दिनुहोस