जिल्ला अदालत धनुषाले एमालेका बैकल्पिक पोलिटव्युरो सदस्य तथा पूर्वसांसद योगनारायण यादवलाई पूर्पक्षका लागि थुनामा राख्ने आदेश दिएको छ ।

न्यायाधीश डा राजेन्द्रकुमार आचार्यको एकल इजलासले यादवसँगै दुर्गा साहलाई समेत पूर्पक्षका लागि थुनामा राख्ने आदेश दिएको हो ।

एक वर्षअघि पूर्वी धनुषाको सबैला गाउँस्थित मदनआश्रित निमावि व्यवस्थापन समिति चयनका लागि भएको विवादमा दुई जनाको ज्यान गएको र केही घाइते भएको घटनाका मुख्य योजनाकार मानिएका यादवमाथि कर्तव्यज्यान तथा ज्यान मार्ने उद्योग मुद्दामा गत २२ चैतदेखि शुरु भएको थुनछेक वहसपछि आज सो आदेश आएको हो ।

यादवमाथि जिल्ला अदालतमा रहेका तीनवटा छुट्टाछुट्टै मुद्दामध्ये हातहतियार तथा खरखजना मुद्दाको वहस भने जारी रहेको छ ।

उक्त घटनामा सबैलाका रामप्रकाश यादवको गोली प्रहारबाट मृत्यु भएको र रामसेवक गोडरी कुटपिटबाट घाइते भएका थिए ।

यादवलाई प्रहरीले १७ चैतमा काठमाडौंको धुम्बराहीस्थित पार्टी मुख्यालय नजिकबाट पक्राउ गरी धनुषा ल्याएको भोलिपल्ट अदालतमा पेश गरेको थियो ।

-ईश्वरचन्द्र झा, जनकपुर

प्रतिकृया दिनुहोस