हिमपहिरो र भूकम्पले अवरुद्ध सगरमाथा आरोहण दुई वर्षपछि चैत अन्तिम साताबाट खुलेको छ ।

आरोहण खुलेलगत्तै २४ दलका २२३ जना विदेशी आरोही खुम्बु क्षेत्र प्रवेश गरेका छन् । सगरमाथा, लोत्से, नुप्चे हिमाल आरोहणका लागि आरोहीहरु काठमाडौंबाट आधारशिविरतर्फ प्रस्थान गरेका छन् ।

अन्य सात दलका ५२ जना विदेशी आरोहीले पर्यटन बोर्डमा आवेदन दिएका छन् । उनीहरु नेपाल आउने तयारीमा छन् । विदेशबाट आरोहीहरुको आवेदन आइरहेको हुँदा यो सिजनमा सगरमाथा आरोहण गर्नेहरु तीन सय बढी पुग्ने अनुमान गरिएको छ ।

लगातारको हिमपहिरोले आरोहण अनिश्चित बनेपछि यस वर्ष आरोहीको संख्या केही घटेको जनाइएको छ । सन् २०१५ मा सगरमाथा आरोहणका लागि ३५६ जना आरोही आधारशिविर पुगेका थिए ।

तर, भूकम्पपछिको हिमपहिरोमा सहकर्मी गुमाएपछि आरोहण स्थगित गरी आरोहीहरु आ–आफ्नो देश फर्किएका थिए । यो वर्ष अप्रिल १६ र १७ देखि आरोहीहरु सगरमाथा आधार शिविरबाट पहिलो शिविरतर्फ जाने क्रम शुरु हुनेछ ।

–बुद्धवीर बाहिङ, सोलुखुम्बु

प्रतिकृया दिनुहोस