ल्होसार (नयाँ बर्ष) को अवसरमा न्युयोर्कस्थित शेर्पा किदुृग अमेरिकाले ल्हाप्सो कार्यक्रम सम्पन्न गरेको छ । कार्यक्रम न्युयोर्क शहरबाट करिब डेट घण्टाको गाडी यात्रामा पुगिने वाल्देन गाउँस्थित छेचेन कुन्छब लिङ गुम्बामा सम्पन्न गरिएको हो ।

ल्हुक ल्हो (भेँडा बर्ष) बिदाई गरी टे (ल्हो (बाँदर बर्षं) शुरु भएको अवसरमा यसपालीको ल्हाप्सो कार्यक्रम गरिएको आयोजकले जनाएको छ । चन्द्र पात्रोमा आधारित रहेर चिनियाँ पध्दती अनुसार बिभिन्न १२ थरीका जनावरलाई बर्षको रुपमा मान्ने परम्परागत प्रचलन नेपालका हिमाली भेगमा बसोबास गर्ने शेर्पा, तामाङ, गुरुङ, ह्योल्मो लगायतका समुदायले प्रयोग गर्ने गर्दछन् ।

चन्द्र पात्रो अनुसार ल्होसार गत फेब्रुअरी ९ तारिकबाट शुरु भए पनि यसको अवसरमा मनाईने ल्हाप्सो कार्यक्रम मौसम अनुकुल बनाउँन यसपाली केहि समय पछि सारिएको हो । अघिल्लो बर्षहरुमा ल्होसार शुरु सँगै हिउँदमै आयोजना गरिन्थ्यो । तर यस पटकबाट हिउँद सके लगत्तै न्यानो याममा पारेर मनाउँदा विगतको तुलनामा सहभागीहरु बढी थिए ।

ल्हाप्सोमा धार्मिक पुजापाठसंगै शेर्पा किदुगका लामा गुरुहरुले महान धर्म गुरु शाक्य ट्रिजेन रिम्पोचेको उपस्थितिमा परम्परागत विभिन्न धार्मिक नृत्यहरु प्रस्तुत गरे । न्युयोर्क र आसपासका राज्यबाट उपस्थित सहभागीहरुले इष्टमित्रहरुसग भेटघाट गर्नको साथै नाचगान गरेर रमाए । यसका साथै सहाभागीहरुले प्रभावशाली धर्मगुरु शाक्य ट्रिजेन रिम्पोचेको दर्शन गर्न पाए ।

तिब्बतीयन बौध्द धर्म मान्यता अनुसार ४१ औ अवतरको रुपमा मानिने धर्म गुरु शाक्य ट्रिजेन रिम्पोचेको जन्म सन् १९४५ मा तिब्बतको छेदाङमा भएको थियो । तिब्बतीयन बौध्द धर्म आध्यात्मिक तहगत प्रणाली अनुसार उनलाई धर्म गुरु दलाई लामापछिको गुरुको रुपमा लिईन्छ ।

धार्मिक नृत्य सके लगतै सबै जना गोलाकार उभिएर हातमा राखेको चम्पा (पिठो) आकाशमा छर्केर देवीदेवताको जयजयकार गदै विश्व शान्ति र सम्पुर्ण प्राणीको कल्याणको कामना ल्हाप्सोमा गरिन्छ ।

किदुगका अध्यक्ष दावा जाङबु शेर्पाका अनुसार शेर्पा समुदायको भाषा, धर्म र सस्कृतिको संरक्षणसंगै विश्व शान्तिको कामना र मानवता वीचको एकताको लागी यो ल्हाप्सो कार्यक्रम गदै आएको हो । कार्यक्रममा गैर शेर्पाहरुको उपस्थिती पनि उल्लेख्य रहेका थिए । शेर्पाहरुले मनाउँदै आएको ल्हाप्सो सँस्क्रिती सम्बन्धमा अमेरिकाका नेपाली समुदाय लगायत अन्य समुदायले समेत चासो बढाउँदै आएको धारणा सगरमाथा आरोही पत्रकार आङ छिरिङ शेर्पाको छ ।

नेपालका शेर्पा बस्तीहरुमा धुमधामसँग मनाउँने ल्हाप्सो परम्परा शेर्पाहरुको बसाई सराई सँगै न्युयोर्क आई पुगेको शेर्पा कदिुगका पुर्व सचिव निमा शेर्पा बताउँछन् । किदुगले प्रत्येक बर्षको ल्हाप्सो कार्यक्रमको लागी नेपालका शेर्पा बस्ती भएको जिल्लाको प्रतिनिधित्व हुने गरी ९ परिवार सम्मिलित ल्हाप्सो आयोजक समिति बनाइन्छ । किदुगका महासचिव जाङबु शेर्पा गोलेले बताए अनुसार ल्हाप्सो कार्यक्रमबाट बचेको रकम किदुगले निकट भविष्यमा अमेरिकामा बनाउँने शेर्पा बस्ती निर्माणमा खर्चिने छ ।

ङिमा पाख्रिन, न्युयोर्क

प्रतिकृया दिनुहोस