मध्यपश्चिमी पहाडी जिल्ला जाजरकोटमा लामो खडेरीका कारण पानीका मुहान सुकेपछि हाहाकार भएको छ ।

स्थानायी नदी र खोलाहरुमा पनि पानीको मात्राको घटदै गएको छ, केही त सुकिसकेका छन् । पानीका मुहान सुकेपछि जिल्लामा खानेपानीको हाहाकार हुन थालेको छ ।

खेतबारीमा तरकारी, फलफुलका बोटबिरुवा र अन्नबाली सुक्न थालेको भेरीमालिका– १ कालेगाँउका किसान भद्रबहादुर बटालाले बताए ।

पोहोर राम्रो वर्षा नभएका कारण यसपाली पानीका मुहान चाँडै सुकेको स्थानीय बताउँछन् ।

जिल्लाका भेरीमालिका–३ पानीनाउला र स्यालामा रहेका ३ ओटा, भेरीमालिका–४ मुलपानी, बोहरा, इउरी र फुलवारीमा रहेका ५ ओटा, भेरीमालिका– २ का दारनेटा, सिमलचौर, च्याउमुढा, बाँसपानी, चिसापानी, गाँरापानी र बुदबुदीमा मा रहेका ८ ओटा खानेपानीका मुहान सुकेका छन् ।

अहिलेसम्म नसुकेका मुल यसपालीको लामो खडेरीले सुकेको भेरीमालिका २ रिसाङ्गका ७० वर्षीय ओकाध्वज कार्कीले बताए ।
पानीका मुहान सुकेपछि सदरमुकाम खलंगा, बोहरा, रिसाङ्ग, दार, स्याला, डाँडागाउँ, जगतिपुर, भुर लगायतका ठाउँमा पानीको हाहाकार छ ।

सबैभन्दा बढी समस्या सदरमुकाममै छ । सदरमुकामका ठाँटी, गैरीखाली, शान्तिचौतारी, रामजानकीटोल, पिपलडाँडा र थाप्लेका धारामा पानी आउन छाडेको छ ।

जनघनत्व बढ्दै गएको तर खानेपानीको स्रोत घट्दै गएकोले समस्या परेको खानेपानी तथा सरसफाई सव–डिभिजन कार्यालयका प्रमुख महेशी महतोले बताए ।

गत वर्ष गतिलो पानी नपर्दा खानेपानीका मुहान चाँडै सुकेको उनको भनाई छ । केही त जलवायु परिवर्तनको असर पनि हुनसक्ने उनको दाबी छ ।

जिल्ला अस्पताल जाजरकोटमा खानेपानी अभावले सरसफाई र विरामीको उपचार समेत प्रभावित भएको जिल्ला स्वास्थ्य कार्यालयले जनाएको छ ।

अस्पतालमा आपूर्ती हुदै आएको खानेपानीको मुहान सुक्दै गएपछि विगत दुई महिना देखि नियमित पानी आपूर्ति हुन सकेको छैन । डा बोमलाल बीसीले गाडीबाट पानी बोकेर काम चलाएको बताए ।

भेरीमालिका–२ का किसान बलराम शर्माले लामो खडेरीका कारण खोलामा पानी समेत सुकेको बताए ।
यसपाली भेरी नदीमा पनि पानीको सतह निकै घटेको छ ।

पोहोर राम्रो वर्षा नहुँदा यसपाली खडेरी पर्‍यो । कर्णाली सँग जोडिएका दर्जन बढी गाविसमा खाद्य संकट समेत छ ।
राजेन्द्र कार्की, जाजरकोट

प्रतिकृया दिनुहोस