समाचारआइतबार, बैशाख ५, २०७३
कांग्रेस चितवनद्वारा खादा प्रयोगमा प्रतिबन्ध
नेपाली कांग्रेस चितवनले आफ्ना कार्यक्रममा खादाको प्रयोगमा प्रतिबन्ध लगाएको छ ।
जलाउँदा वातावरणमा असर गर्ने र गाड्दा पनि नकुहिने भएकाले खादा प्रयोगलाई निरुत्साहित गर्न यस्तो निर्णय गरेको काँग्रेस चितवनका सभापति जितनारायण श्रेष्ठले जानकारी दिए । आजदेखि नै यसलाई कार्यान्वयनमा ल्याएको उनले बताए ।
जमिनमा पुरेको खण्डमा समेत कृषि र माटोमा समेत असर गर्ने देखिएको र ढलमा अड्किएको अवस्थामा पनि वातावरणमा असर गरेको पाइएकाले खादा प्रयोग नगर्न कांग्रेस चितवनले आफ्ना कार्यकर्तालाई समेत खादाको प्रयोग नगर्न निर्देशन दिएको छ । यसको विकल्पमा गम्छा उपयुक्त हुने जनाइएको छ ।
अन्य विकल्पमा फूलमाला, पिपलको पातजस्ता वस्तु प्रयोग गर्दा उपयुक्त हुने भन्दै यस्तो निर्णय गरिएको श्रेष्ठले बताए ।
यसले ठूलो मात्रामा नेपाली पैसा विदेश गइरहेको समेत कांग्रेसले जनाएको छ । स्वदेशी उत्पादनलाई प्राथमिकता दिनसमेत काँग्रेस चितवनले आह्वान गरेको छ ।
जिल्लामा उत्पादित फोहरमा खादा अत्यधिक देखिएको छ । चितवनमा गएको वर्ष करिब १९ करोडको खादामात्रै बिक्री भएको तथ्याङ्क आएकाले यसरी पैसा खेर नफाल्नसमेत आग्रह गरिएको श्रेष्ठले बताए ।
रासस