अपहरणमा संलग्न रहेको आरोपमा एमाओवादी बाराका जिल्ला सदस्यसहित दुई जनालाई प्रहरीले वीरगञ्जबाट पक्रेको छ ।

प्रहरीले कलैया– २३ का एमाओवादी बारा जिल्ला कार्य समिति सदस्य रामनारायण पाल (४०) र सोही ठाँउ बस्ने बृजकिशोर साह (२३) लाई अपहरणकारीको आरोपमा पक्राउ गरेको हो ।

उनीहरुले कलैया–१० का जिआउल रहमान (३१) लाई अपहरण गरी चार दिनसम्म बन्धक बनाएको प्रहरीले जनाएको छ ।

दुवै जनालाई प्रहरीले ६ बैशाख साँझ वीरगञ्जको अशोकवाटिकाबाट पक्राउ गरेको थियो ।
वीरगन्जको अशोकवाटिकामा रहेको पूर्णीमा कागज उद्योगमा बन्धक बनाएर राखिएका रहमानलाई पनि प्रहरीले सकुशल उद्दार गरेको छ ।

“दुई वर्ष पहिले रहमानले माओवादी नेता पालसंग तीन लाख रुपैयाँ सापटी लिएका रहेछन्,” प्रहरी नाउब उपरीक्षक होबिन्द्र बोगटीले भने, “रकम असुल्नका लागि पालले रहमानलाई बैशाख ३ गते वीरगञ्ज १८ भिस्वाबाट अपहरण गरेर बाराको बरैनिया, वीरगन्जको होटल गंगोत्री, टिवडेवाल धर्मशाला र अशोकवाटिकाको कागज उद्योगमा गरी चार दिन सम्म बन्धक बनाएर राखेछन् ।”

६ बैशाख सोमबार रहमानले दाजुको मोबाइलमा एसएमएस गरेर आफू अपहरणमा परेको खबर गरेका थिए । रहमानका दाजुले घटनाबारे जिल्ला प्रहरी कार्यालय पर्सामा खबर गरे लगत्तै खटिएको प्रहरीको टोलीले रहमानलाई अशोकवाटिकाको कागज उद्योगबाट उद्दार गर्नुको साथै अभियुक्तलाई पक्रेको प्रहरी नायब उपरिक्षक होविन्द्र बोगटीले बताए ।

पाल र साहलाई जिल्ला प्रहरी कार्यालय पर्साको हिरासतमा राखेर अपहरण तथा शरीर बन्धक मुद्दामा म्याद थप गरी थप अनुसन्धान भईरहेको प्रहरीले जनाएको छ ।
सुरेश बिडारी, वीरगञ्ज

प्रतिकृया दिनुहोस