काठमाडौंको पुरानो बसपार्कमा ‘काठमाडौँ टावर’ बन्ने भएपछि टावर निर्माण अवधिभर बसपार्क खुलामञ्चमा सारिने भएको छ ।

काठमाडौँ महानगरपालिका प्रवक्ता ज्ञानेन्द्र कार्कीका अनुसार टावर निर्माणका लागि हाल खुलामञ्चमा जस्ताले बार्ने काम भइरहेको छ । उक्त काम सकिनेबित्तिकै यातायातका साधनलाई स्थानान्तरण गरी टावर निर्माणको काम शुरु गरिने छ ।

“टावर निर्माणको योजना भूकम्पअघि नै आएको र भूकम्पपछि टावरको संरचना फरक भएकाले निर्माण प्रक्रिया ढिला भएको हो” – प्रवक्ता कार्कीले भने ।

भूकम्प पूर्वको योजनाअनुसार टावर २९ तला बनाउने तयारी रहेको थियो । भूकम्पपछि भवन निर्माणको मापदण्ड फेरबदल भएकाले भवन पूर्णरूपमा भूकम्प प्रतिरोधात्मक बनाइने छ । अहिले १२ तलाको बनाउने नक्सालाई स्वीकृति दिइएको छ ।

प्रस्तावित सुविधासम्पन्न भवनको विस्तृत अध्ययन प्रतिवेदन (डिपिआर) तथा वातावरणीय प्रभाव मूल्याङ्कनसमेत तयार भइसकेको कामपाले बताएको छ ।

राजस्व महाशाखा प्रमुख महेश काफ्लेका अनुसार उक्त टावर निर्माणका लागि जलेश्वर, स्वच्छन्द र विकोइसँग सम्झौता गरिसकेको छ । सम्झौताअनुसार ती कम्पनीले आफ्नो लगानीमा भवन बनाएर ३० वर्षसम्म चलाउने छन् ।

काम शुरु भएको पाँच वर्षभित्र सो टावर बनाइसक्नुपर्ने छ भने त्यसपछिका २५ वर्ष सञ्चालन अवधि रहनेछ । यो टावर नेपालमा अहिलेसम्म बनेका भवनभन्दा पृथक र अत्याधुनिक हुने महानगरपालिकाले जनाएको छ ।

टावरको लागत रु तीन अर्ब ५० करोड पुग्ने अनुमान महानगरपालिकाले गरेको छ । भवनको सबैभन्दा तल्लो तलामा बसको पार्किङ रहनेछ । त्यसमाथिका दुई तलामा हलुका गाडीको पार्किङ, व्यवस्थित सिनेमा हल, पौडी पोखरी, रेस्टुराँ, बैंक तथा महानगरपालिकाको वडा कार्यालयसमेत रहनेछन् । भवनका लागि २३ रोपनी पाँच आना जग्गा छुट्याइएको छ । नेपाली कला र संस्कृतिको झलक सो भवनमा देख्न पाइने छ ।

प्रतिकृया दिनुहोस