बाँके निकुञ्जमा लागेको आगो निभाउँदै नेपाली सेना ।

बाँके राष्ट्रिय निकुञ्जको करिब ४० प्रतिशत वनक्षेत्रमा डढेलोले लागेको छ । १३ चैतमा भगवती सामुदायिक वन ओभरीबाट शुरु भएको आगलागी अहिलेसम्म नियन्त्रणमा आएको छैन ।

लामो खडेरीका कारण लागेको डढेलोले वन्यजन्तु तथा पंछी संकटमा परेका छन् । खरायो, रतुवा, दुम्सी लगायत साना वन्यजन्तु र झाडीमा गुँड बनाउने चराहरुलाई डढेलोले प्रत्यक्ष असर गरेको छ ।

वासस्थानमा डढेलो लागेपछि चराहरु चिसो र अग्लो ठाउँतिर बसाई सरेका छन् ।

डढेलोबाट बनका किराहरु नष्ट हुँदा किरा खाने चराको आहारा समेत सखाप भएको छ ।

यसै पनि पानीको स्रोत निकै कम भएको बाँके निकुञ्जमा यसपटकको खडेरी र डढेलोका कारण भएका स्रोत पनि सुकेका छन् ।

निकुञ्जभित्रका पोखरी सुकेपछि निकुञ्ज प्रशासनले १० ठाउँमा पानी पोखरी निर्माण गरे पनि त्यो पर्याप्त छैन ।

बाघ र पंछी गणनामा असर
पाटेबाघको संरक्षण गर्ने उद्देश्यका साथ स्थापना भएको बाँके निकुञ्जमा जारी बाघ र पंछीको गणना कार्य पनि डढेलोले प्रभावित भएको छ ।

बाघ गणनाका लागि राखिएका केही स्वचालित क्यामरा डढेलोले जलेका छन् ।

वनमा लागेको आगोले धेरै चराहरुले बसाइँ सर्दा समेत सर्वेक्षणमा समस्या आएको छ । निकुञ्जको ठूलो क्षेत्रमा डढेलो लागेकाले जैविक विविधतामा प्रत्यक्ष असर परेको निकुञ्जको भनाई छ ।

डढेलो नियन्त्रणका लागि खटिएको नेपाली सेनासँग आगो निभाउने ‘वाटर जेट गन’ पर्याप्त छैन ।

आगो निभाउन गएका केही सेनाको हात, मुख, पाखुरा र खुट्टा जलेको प्रमुख सेनानी जयन्द्र केसीले बताए ।
केशव राना, बाँके

प्रतिकृया दिनुहोस