राष्ट्रिय प्रजातन्त्र पार्टीका बरिष्ठ नेता पशुपति शम्शेर राणाले एमाओवादी अध्यक्ष पुष्पकमल दाहालको नेतृत्वमा सहमतिको सरकार बनाउँदा आफ्नो दललाई कुनै आपत्ति नरहने बताएका छन् ।

रिपोर्टर्स क्लबले आयोजना गरेको साक्षात्कारमा बोल्दै राप्रपा अध्यक्ष राणाले दाहालको नेतृत्वमा सरकार बनाउन आफ्नो समर्थन रहे पनि नरहेपनि केपी शर्मा ओली नेतृत्वको वर्तमान सरकार भने ढल्ने निश्चित भएको दाबी गरे ।

सरकारलाई दिएको समर्थन फिर्ता लिने र नयाँ सरकारका लागि कसको समर्थन गर्ने भन्ने बारे पार्टीका प्रमुख तीन नेता र कार्य सम्पादनसमितिको बैठक बसेर ठोस निर्णय गर्ने उनले स्पष्ट पारे ।

भुकम्पपछिको पुनर्निर्माण र नाकाबन्दीका बेलाको आपूर्ति ब्यवस्थाको विषयमा जुद्ध शम्शेर र मरिचमान सिंहले गरे जति पनि काम गर्न वर्तमान सरकारले नसकेको आरोप लगाउँदै राणाले अहिलेको सरकार मुलुकका कुनै पनि समस्या समाधानमा लचिलो नभएको आरोप लगाए ।

उनले भने, “पुनःनिर्माणमा यो सरकार जुद्ध शम्शेर भन्दा अदक्ष देखियो, मरिचमान सिंहले १३ महिनासम्म नाकाबन्दी झेल्दा जहाजबाट तेल ल्याए तर, यत्रो कालोबजारी भएन । नाकाबन्दी अन्त्य भएको दुई महिना वित्दा पनि अभाव जारी नै छ । यो भन्दा दयनीय सरकार अरु के हुन सक्छ ?”

राणाले मधेशको समस्या समाधान गर्न सरकार लचिलो नभएको भन्दै वार्तामा ल्याएर समस्या समाधान गर्न सरकार असफल भएको टिप्पणी गरे ।

प्रतिकृया दिनुहोस