उपप्रधानमन्त्री तथा राप्रपा नेपालका अध्यक्ष कमल थापाले वर्तमान सरकारको विकल्प खोज्ने निर्णयमाथि पुनःविचार गर्न एमाओवादी अध्यक्ष पुष्पकमल दाहाललाई सुझाव दिएका छन् ।

मिडिया नेपाल मकवानपुरले आज हेटौँडामा आयोजना गरेको पत्रकारसम्मेलनमा बोल्दै अध्यक्ष थापाले भने, ‘‘सरकार परिवर्तन गर्दा राष्ट्रियता कमजोर हुने, राजनीतिक अस्थिरता बढ्दै जाने तथा संविधान कार्यान्वयन कठिन र जटिल हुँदै जाने भएकाले यसमा पुनः विचार गर्न आग्रह गर्दछु ।’’

अध्यक्ष थापाले भूकम्प, मधेश आन्दोलन, भारतद्वारा अघोषित नाकाबन्दीजस्ता विषम परिस्थितिमा बनेको सरकारले आर्थिक विकास र पुनःनिर्माणको काम अघि बढाउने अवस्थामा दाहालले आफ्नो नेतृत्वमा सरकार गठन गर्ने वक्तव्य निकाल्नु अप्रत्याशित र अनपेक्षित रहेको बताए ।

उनले वर्तमान सरकार गठनका बेला रोक्न लागिपरिको बाह्य शक्तिले फेरि चलखेल गरेको आरोप लगाए ।

अध्यक्ष थापाले वर्तमान सरकारको ६ महिने कार्यकालमा भएका काम कारबाहीको जश अपजशको भागी हामी सबै हौँ भन्दै देशलाई अस्थिरताबाट जोगाई राष्ट्रिय एकता बलियो बनाएर संविधान कार्यान्वयन र आर्थिक उन्नतितर्फ हामी सबै लाग्नुपर्ने बताएका थिए ।

उनले राप्रपा नेपालको केन्द्रीय कार्यसम्पादन समितिको आज बस्ने बैठकले वर्तमान परिस्थितिको समीक्षा गरी पार्टीको धारणा सार्वजनिक गर्ने जानकारी दिए ।

प्रतिकृया दिनुहोस