सत्य निरुपण तथा मेलमिलाप आयोगका सदस्य मञ्चला झाले पीडितले चुरोटको बट्टामा लेखेर दिएको उजुरी पनि बुझ्ने बताएकी छन् ।

जिल्लास्थित मानव अधिकारवादी, स्थानीय शान्ति समितिका पदाधिकारी, नागरिक समाजका अगुवा तथा पत्रकारसँगको छलफल कार्यक्रममा सदस्य झाले यस्तो धारणा राखेकी हुन । आयोगको समयावधि मात्र नौ महिना रहेको बताउँदै उनले परेका उजुरीको सवालमा दिनरात गरेर भए पनि काम गर्ने बताइन् ।

मुलुकका आठवटा गम्भीर प्रकृतिका मानव अधिकार उल्लङ्घनका घटनालाई सूचीबद्ध गराइएको बताउँदै झाले सङ्क्रमणकालीन न्यायका लागि हदम्याद लाग्न नहुनेमा जोड दिइन । उनका अनुसार आयोगको यो काम पूरा गर्न तथा शान्ति प्रक्रियालाई तार्किक निष्कर्षमा पुर्याउन निर्वाध अघि बढिनेछ, तर सही कार्यान्वयन नभए त्यसको निगरानी राष्ट्रिय मानव अधिकार, प्रेसजगत् र नागरिक समाजले गर्नेछ ।

आयोगमा ५०औँ हजार मुद्दा पर्न सक्छन्, एक/एक गरेर हेर्न नभ्याइने, तर विशेष प्रकृतिका मुद्दा भने सबै हेरिने सदस्य झाको भनाइ थियो । त्यसका लागि आयोगले विज्ञ व्यक्तिलाई करारमा लिने, बजेट, जनशक्ति तथा अन्य आवश्यक स्रोत, साधनको व्यवस्था गर्नुपर्नेमा जोड दिए । रासस

प्रतिकृया दिनुहोस