बस दुर्घटनामा परी घाइते भएका बालबालिकाको स्वास्थ्यकेन्द्रमा उपचार गरिंदै । तस्वीर: सुरजकुमार भुजेल

मकवानपुरमा स्कूल दुर्घटना हुँदा २२ जना बालबालिका घाइते भएका छन् ।

मकवानपुरको थाहा नगरपालिका, शिखरकोटस्थित हिमालयन इंगलिस सेकेण्डरी बोर्डिङ स्कुलको बस विद्यार्थी लिएर स्कुलतर्फ जाँदै गर्दा दामन–डाँडाबास सडकखण्डको नागदह नजिकै ४ जेठ विहान ९ः४५ बजे सडकमा पल्टिएको हो ।

बा २ ख २०२८ नं. को बस पल्टिंदा घाइते भएका २२ जना बालबालिकाकोे प्राथमिक स्वास्थ्य केन्द्र पालुङमा उपचार भइरहेको छ ।

इलाका प्रहरी कार्यालय पालुङका प्रमुख विरेन्द्र पनेरुका अनुसार एकजना विद्यार्थीको हात भाँच्चिएको छ भने बाँकीलाई सामान्य चोटपटक लागेको छ ।

बस थोत्रो भएकोले पल्टिएको अभिभावकहरुले आरोप लगाएका छन् । यस अघि १८ चैतमा हेटौंडाको मक्रान्चुलीमा स्कुलबस दुर्घटना हुँदा ३५ जना घाइते भएका थिए ।
सुरजकुमार भुजेल, मकवानपुर

प्रतिकृया दिनुहोस