जिल्ला प्रहरी कार्यालय पाँचथरले २० वर्ष पुरानो मुद्दामा अनुसन्धान गर्न भन्दै पाँचथर जिल्ला अस्पतालका तत्कालीन प्रमुख डा. ताराप्रसाद पोखरेललाई पक्राउ गरेको छ ।

इलाम घर भएका डा. पोखरेललाई २०५३ सालमा उजुरी दर्ता भई तामेलीमा रहेको सरकारी छाप र दस्तखत किर्ते मुद्दामा अनुसन्धानका लागि प्रकाउ गरिएको पाँचथरका प्रहरी प्रमुख (डिएसपी) कृष्णप्रसाद कोइरालाले जानकारी दिए ।

औषधि व्यवसायी वसन्त पाण्डेले दर्ता गराएको मुद्दा अनुसन्धान गर्न भन्दै उनलाई पक्राउ गरिएको डिएसपी कोइरालाले बताए ।

डा पोखरेल पाँचथर अस्पतालको प्रमूख हुनुपूर्व उजुरीकर्ता पाण्डेले अनिरुद्र सहकारी मार्फत अस्पताल परिषर भित्रै औषधि पसल सञ्चालन गर्दै आएका थिए ।

डा पोखरेल मेसु भएर आएपछि अस्पताल परिषरमा निजी पसल राख्न नपाइने अस्पताल विकास समितिले निर्णय गरेको थियो । समितिको निर्णयबाट पसल बन्द गराइए पनि पाण्डेले मन्त्रालयवाट अस्पताल परिषरमा पसल सञ्चालन गर्न दिनु भन्ने आशयको पत्र लेखाएर ल्याएका थिए ।

मन्त्रालयबाट पत्र आए पनि समितिले आफ्नो निर्णय सच्याउन नचाहेपछि पाण्डेले पोखरेललाई विपक्षी बनाई अदालतमा मुद्दा दर्ता गराए तर अदालतले डा पोखरेलका पक्षमा फैसला सुनायो ।

तर पाण्डेले फेरि डा पोखरेलले विभागको पत्रमा टिपेक्स लगाई सरकारी छाप दस्तखत किर्ते गरेको भन्दै २०५३ मा अर्को मुद्दा दर्ता गराएका थिए । त्यही मुद्दामा अनुसन्धानका क्रममा उनी अहिले पक्राउ गरेका हुन् ।

प्रहरीले पोखरेलमाथि अनुसन्धान गर्न भन्दै ७ दिनको म्याद थप गराएको छ ।

२०५२ देखि ०५६ सालसम्म पाँचथर अस्पतालमा मेसुको जिम्मेवारी सम्हालेका डाक्टर पोखरेलले त्यसपछि इलाम अस्पताल हुँदै स्वास्थ सेवा विभागको बालरोग महाशाखा तथा बिपद् व्यवस्थापन महाशाखा प्रमुखसम्मको जिम्वेवारी सम्हालिसकेका छन ।

महाशाखामा रहँदा अनियमितता गरेको अख्तियार दुरुपयोग अनुसन्धान आयोगले आरोप लगाएपछि उनी निलम्बित अवस्थामा छन् ।
लक्ष्मी गौतम, पाँचथर

प्रतिकृया दिनुहोस