बैतडीमा आत्महत्याका घटना गत वर्षभन्दा दोब्बरले बढेको छ ।

जिल्ला प्रहरी कार्यालयले बैतडीका अनुसार गत आर्थिक वर्षमा १६ वटा आत्महत्याका घटना भएका थिए भने चालु आर्थिक वर्ष सकिन दुई महिना बाँकी छँदै आत्महत्या गर्नेको सङख्या २७ पुगेको छ । जसमध्ये सबैभन्दा बढी २२ जनाले झुन्डिएर आत्महत्या गरेका छन् ।

त्यस्तै, विष सेवन गरेर तीन जनाले आत्महत्या गरेको जिल्ला प्रहरी कार्यालयका मुद्दा फाँटका प्रमुख प्रहरी नायब निरीक्षक धर्मानन्द भट्टले बताए । उनले भने, “एक जनाले आत्मदाह र एक जनाले नदीमा हाम फालेर आत्महत्या गरेका छन् ।” गत आव २०७१/७२ मा झुन्डिएर १४ र विष सेवन गरेर दुई जनाले जनाले आत्महत्या गरेका थिए ।

आत्महत्याका घटना बढ्दै जानुमा पारिवारिक कलह, कमजोर आर्थिक स्थिति, मानसिक रोग, मादकपदार्थ सेवन लगायतका कारण रहेको जिल्ला प्रहरी कार्यालयका प्रमुख प्रहरी नायब उपरीक्षक मोहनप्रसाद पोखरेलले बताए ।

उनले भने, “प्रेममा धोका पनि आत्महत्याको कारण रहेको छ ।” आत्महत्यालाई कम गर्न प्रहरीले जनचेतनाको कार्यक्रम व्यापकरुपमा सञ्चालन गरिरहेको भएपनि यो नियन्त्रणमा चुनौती रहेको समेत उनले बताए ।

आत्महत्या रोक्ने प्रयास गरौ

प्रतिकृया दिनुहोस