बाराको मोतिसरस्थित नेपाल राष्ट्रिय माध्यमिक विद्यालयमा अध्ययनरत विद्यार्थी तथा शिक्षकहरु जिर्ण भवनमा त्रासपूर्ण वातावरणमा पठनपाठन गर्न बाध्य छन् ।

२०१९ सालमा स्थापना भएको विद्यालयभवनको छत चारैतिर चिराचिरा परेको छ, कहिले भत्किन्छ थाहा छैन । विद्यालयकै कमपाउण्डमा १३ हजार भोल्टको तार सहितको ट्रन्सफरमर जडान गरिएकाले पनि असुरक्षा बढाएको छ ।

५३ वर्ष पुरानो यो विद्यालयमा माध्यमिक तहमा १२ जना मात्रै शिक्षक–शिक्षिका छन् ।

कक्षा कोठामा पढदै गर्दा छतबाट रोडा, बालुवा खस्ने गरेको र त्यस्तो बेला कक्षा छोडेर भाग्ने गरेको विद्यार्थीहरु बताउँछन् । छतबाट खसेको इटा ढुंगाले ४ वर्षको बीचमा करिब २५ जना विद्यार्थीलाई चोटपटक लागिसकेको छ ।

कक्षा कोठामा झयाल ढोकाका पल्ला छैनन् । बर्खामा छत त तप्किन्छ नै हावासहित वर्षा भयो भने झ्याल–ढोकाबाट समेत पानी पस्छ ।

गतवर्षको भूकम्पले भवनको अधिकांश भागमा चिरा परेको छ । त्यसैले पनि विद्यार्थीहरु बढी त्रसित छन् ।

कक्षामा पढ्न बस्दा शिक्षकले पढाएको भन्दा पनि कतिबेला भूकम्प आउँछ र छत खस्छ भन्नेमा ध्यान गइरहने विद्यार्थी सलमा खातुनले बताईन् ।

अभिभावकहरु समेत आफ्ना छोराछोरी नफर्कंदा सम्म ढुक्क हुने अवस्था छैन । “पढाउन त पठाउनै पर्‍यो तर कतिबेला के हुन्छ भन्ने डर लागिरहन्छ,” अभिभावक सुखल साहले भने ।

विद्यालयसँग बजेटको अभाव रहेको र शिक्षा कार्यालयसहित अन्य निकायबाट कुनै सहयोग नहुँदा भवन मर्मत गर्न नसकिएको प्रधानाध्यापक रामउदार साहको भनाई छ ।

“हावाहुरी चल्यो भने मात्रै पनि विद्यार्थीहरु घर भागिहाल्छन्, गर्मी र वर्खा नभए चौरमै पढाउन हुन्थ्यो त्यो पनि मिलेन,” उनले भने ।
जियालाल साह, वीरगञ्ज

प्रतिकृया दिनुहोस