तस्वीर: गोपाल भण्डारी

राष्ट्पति विद्यादेवी भण्डारीले २५६० औं बुद्ध जयन्तीको अवसर पारेर गौतम बुद्धका पिता राजा शुद्धोधनको दरवार क्षेत्र तिलौराकोटको अवलोकन गरेकी छन् ।

आज, ७ जेठ दिउँसो लुम्विनी आइपुगेकी राष्ट्पति भण्डारी त्यहाँ पूजा र अवलोकनपछि तिलौराकोट आइपुगेकी हुन् ।

कान्छी छोरी सहित तिलौराकोट पुगेकी राष्ट्रपति भण्डारीले बुद्धका पिता राजा शुद्धोधनको दरवारको भग्नावशेष, बुद्धले गृह त्याग गरेको पूर्वी द्वार, दरवार क्षेत्रको पश्चिमी द्वारको अवलोकन गरेकी छन् ।

उनलाई पुरातत्व विभागका प्रमुख पुरातत्व अधिकृत राम बहादुर कुंवरले प्राचीन कपिलवस्तुको बौद्धकालीन ईतिहास र तिलौराकोट दरवार क्षेत्रको उत्खननका बारेमा जानकारी गराएका थिए ।

राष्ट्पतिको स्वागतका लागि सभासद् बलराम अधिकारी, सभासद् अतहर कमाल र प्रमुख जिल्ला अधिकारी ईन्दु घिमिरे लगायत जिल्लाका सरकारी कार्यालयका प्रमुख र सुरक्षा निकायका प्रमुखहरु उपस्थित थिए ।

तिलौराकोट भ्रमण पछि राष्ट्पति भण्डारी हेलिकप्टरबाटै बुद्धको मावली स्थल रुपन्देहीको देवदह र बुद्ध अस्तु धातु राखिएको नवलपरासीको रामग्राम तर्फ लागेकी छन ।

सो अवसरमा राष्ट्रपति भण्डारीले तिलौराकोट दरवार क्षेत्रको गेट वाहिर बसेका सर्वसाधारणहरुसँग कुराकानी गरेकी थिइन् ।
गोपाल भण्डारी, कपिलवस्तु

प्रतिकृया दिनुहोस