बैतडीको तल्लो स्वराड क्षेत्रमा पर्ने रोडीदेवल गाविसको आमपुर माध्यमिक विद्यालय, बिजुलका छात्रामा एक महिनादेखि देखिएको ‘मासहिस्टरिया’ का कारण पढाइ प्रभावित हुँदै आएको छ ।

छात्रामा एक महिनायता पटकपटक पेट दुख्ने, टाउको दुख्ने, चिच्याउने बेहोस हुनेजस्ता लक्षण देखापरेपछि पढाइ प्रभावित भएको प्रधानाध्यापक टीकादत्त भट्टले बताए ।

विद्यालयमा दिनहुँ बिहान ८:३० देखि ९ बजेसम्म निमावि र मावि तहका छात्रामा यस्तो समस्या आउने गरेको छ, प्रधानाध्यापक भट्टले भने–“कक्षाकोठामै बेहोस हुने अनि बोकेर कार्यालयको कोठामा लैजाने र केही घन्टापछि आफैँ ठीक हुने गरेका छन् ।”

केही महिनादेखि उक्त विद्यालयमा यस्तो समस्या देखापरे पनि यो शैक्षिक सत्रको सुरुवातदेखि निरन्तर देखिन थालेपछि पढाइ प्रभावित हुने गरेको समेत उनले बताए ।

निमावि र मावि तहका छात्रा विद्यालयमा पठनपाठनका क्रममा एकाएक ढल्न थालेपछि शिक्षक र अभिभावकसमेत हैरान भएको प्रधानाध्यापक भट्टले बताए ।

देवताको दोष भन्दै अभिभावकको सुझावमा विद्यालयमा मन्दिर निर्माण गरी पूजापाठ गरेको भए पनि ठीक नभएको विद्यालयले जनाएको छ ।

मास हिस्टरियाको यस्तो समस्यालाई कसैले यौनसँग सम्बन्धित त कसैले देउता वा भूत लागेको बताउने गरेको पनि यो मानसिक तनावले उत्पन्न हुने समस्या भएको र एकजनालाई भएपछि अरुले पनि त्यसको अनुकरण गर्दै जाने चिकित्सक बताउँछन् । मानसिक तनाव कुनै एउटै कारणले नभई विभिन्न कारणले हुन्छ ।

यस्तो समस्या भएकाहरुलाई विद्यालय र परिवारमा सान्त्वना दिने, उनीहरुलाई सहयोग गर्ने र उनीहरुको फरक क्षमता, जिज्ञासा, तनावलाई बुझेर सकारात्मकता तर्फ प्रेरित गर्नु पर्ने चिकित्सकको भनाई छ ।

प्रतिकृया दिनुहोस