वीरगञ्जको मुर्ली टोलस्थित आफ्नै घरमा मृत फेला परेकी महिला राधा साहले आत्महत्या नगरी उनको हत्या भएको राधाका माइती पक्षले आरोप लगाएका छन् ।

वीरगञ्जको मुर्ली बगैंचा–१५ की राधादेवी साहकानुलाई उनका पतिका परिवारले यातना दिई हत्या गरेको महिलाका दाजु जितेन्द्रप्रसाद गुप्ताले आरोप लगाएका छन् ।

वाराको गढीमाईकी राधाको तीन महीनाअघि १० फागुनमा वीरगञ्ज मुर्ली बगैंचाका सुवासप्रसाद साहसँग बिहे भएको थियो । उनी ७ जेठ बिहान आफ्नै कोठामा (पतिको घरमा) झुण्डिएको अवस्थामा फेला परेकी थिइन् ।

५ जेठमा माइतीबाट घर फर्केकी बहिनीको ७ जेठ विहान मृत्यु भए पनि घटनाको जानकारी माइती पक्षलाई वेलुका ५ बजे मात्रै दिइएको र त्यसअघि कबोल अनुसार दाइजो नल्याएको भन्दै  उनका सासु ससुराले प्रताडित गरेको मृतकका दाई जितेन्द्रले आरोप लगाए ।

उनका अनुसार विवाहका बेला रु २५ लाख दाइजो दिने सहमति भएकोमा तीन महीनाभित्र पटक पटक गरी २३ लाख दिइएको र बाँकी दुई लाख दिन बाँकी थियो । दाइजो वापत कवोल गरेको रकम समयमै नदिएको भन्दै राधालाई उनका सासु–ससुराले विभिन्न लान्छना लगाउने र रकम लिन माइती पठाउने गरेका थिए ।

दाइजो पूरा नल्याएको निहुँमा बहिनीमाथि कुटपिट समेत हुने गरेको जितेन्द्रको दाबी छ ।

पर्साका प्रहरी उपरीक्षक राजुबाबु श्रेष्ठले भने पोष्टमार्टमको रिपोर्ट आएपछि मात्रै के भएको हो भन्न सकिने बताएका छन् ।

प्रहरीले घटनाको अनुसन्धान गरिरहेको तर, शवको पोस्टमार्टम सकिए पनि रिपोर्ट प्राप्त भइनसकेको जनाएको छ ।

मानवअधिकार तथा महिलाअधिकारकर्मीहरुको उपस्थितिमा १० जेठमा आयोजना गरिएको पत्रकार समेलनमा मृतकका आफन्तले राधाले कुनै हालतमा आत्माहत्या गर्न नसक्ने भन्दै सबैको मिलोमतोमा दोषिलाई उन्मुक्ति दिन प्रयास भइरहेको आरोप लगाए ।
जियालाल साह, वीरगञ्ज

प्रतिकृया दिनुहोस