घरमा पानी तान्ने मोटर चलाउने क्रममा करेन्ट लागेर नेकपा एमाले नवलपरासीका सचिवालय सदस्य परशुराम चौधरीको निधन भएको छ ।

एमाले नवलपरासी क्षेत्र नं. ५ का ईन्चार्ज समेत रहेका ५५ वर्षीय चौधरीको जहदा –१ स्थित मझौनीमा पानीका लागि मोटर चलाउदा करेन्ट लागेको थियो । बेहोस भएका उनलाई उपचारका लागि पृथ्वीचन्द्र अस्पताल परासी लैजादै गर्दा निधन भएको पारिवारिक स्रोतले बताएको छ ।

चौधरी २०४९ सालमा जिल्ला विकास समितिका सदस्य चुनिएका थिए भने सुनवल चिनी कारखानाको बोर्ड सदस्य, २०७१ सालदेखि सुकुम्बासी समस्या समाधान आयोगका सदस्य पनि थिए ।

चौधरीको निधनमा एमालेले शोक व्यक्त गर्दै तीन दिन पार्टी कार्यालयमा झण्डा झुकाउने र कुनै पनि औपचारिक कार्यक्रम नगर्ने जनाएको छ ।

चौधरीलाई श्रद्धाञ्जली व्यक्त गर्न गाउँगाउँबाट एमालेका कार्यकर्ताहरु पार्टी कार्यालय परासी र दाहसंस्कार स्थल त्रिबेणी धाममा पुगेका थिए ।

चौधरीको दिउसो दुई बजे त्रिबेणीमा अन्तिम संस्कार गरिएको छ । अन्तिम संस्कारमा एमालेका केन्द्रीय नेताहरु बैजनाथ चौधरी, तिलक महत, जिल्ला अध्यक्ष रोशनबहादुर गाहा, सचिव एव. सांसद जीवन श्रेष्ठ लगाएका नेता तथा कार्यकर्ताहरु सहभागी थिए ।

दिवंगत चौधरीका एक श्रीमती तीन छोरा र एक छोरी छन् ।
विद्रोही गिरी, नवलपरासी

प्रतिकृया दिनुहोस