फुटवलर बिमल घर्ती मगरकी बहिनी मनिषा घर्ती मगरको हत्या आशंकामा प्रहरीले दुई युवकलाई पक्राउ गरेको छ ।

हिजो, १२ जेठ राति नवपलरासीको वर्दघाट –८ पञ्चनगर स्थित घरमा एक्लै रहेकी मनिषा आज बिहान घरभित्र मृत फेला परेकी हुन् ।

अघिल्लो दिन कामका लागि बुटवल गएकी उनकी आमा विहान घर फर्कंदा छोरीलाई मृत अवस्थामा देखेपछि आफन्त र प्रहरीलाई खबर गरेकी थिइन् ।

मनिषाको शरीरको आधाभाग खाटमा र आधाभाग कुर्सीमा रहेको अवस्थामा भेटिएको र खाटमा रगतको दाग देखिएको प्रहरी उपरीक्षक राजेन्द्र चौधरीले जानकारी दिए । बेलुका ८/९ बजे तिर घटना भएको हुन सक्ने उनको  अनुमान छ ।

पक्राउ परेका दुबै जनामाथि अनुसन्धान भइरहेको र बेलुकासम्म थप जानकारी आउने एसपी चौधरीले बताए ।

“शव पोष्टमार्टमका लागि अस्पताल लगिएको छ, रिपोर्ट आएपछि आत्महत्या वा हत्या के हो थाहा हुन्छ,” उनले भने ।

मनिषा स्थानीय न्यूलाइफ उच्च मावि बर्दघाटमा कक्षा ११ को परीक्षा दिएर बसेकी थिइन् । मनिषाका दाई विमल अहिले विदेशमा छन् ।

विद्रोही गिरी, नवलपरासी

प्रतिकृया दिनुहोस