५० शैय्याको भनिएको जाजरकोट जिल्ला अस्पताल भवन । तस्वीर: राजेन्द्र कार्की

सुत्केरी ब्यथा लागेपछि जाजरकोट भेरिमालिका–३ की सुशीला पुन शाहलाई जाजरकोट जिल्ला अस्पताल लगियो । अस्पतालले एक दिन राखेर उनलाई रुकुमको एक निजी अस्पतालमा रेफर गर्‍यो ।

चिकित्सक र पूर्वाधार विहिन जाजरकोटको १५ शैय्याको सरकारी अस्पताललाई एकसाता अघि मात्रै गृहमन्त्री शक्तिबहादुर बस्नेतले ५० शैय्याको स्तरवृद्धि भएको घोषणा गरेका थिए । तर, त्यो स्तरवृद्धि कागजमा मात्रै सिमित छ ।

जाजरकोटकै भेरीमालिका–२ राङ्गसी कि रत्न शाहलाई पनि २६ हप्तामै सुत्केरी व्यथा लागेपछि जिल्ला अस्पताल लगियो । स्तरवृद्धि भएको भनिएको अस्पतालमा उनको पनि उपचार हुन सकेन र चौरजहारी नै पठाइयो ।

समय नपुगी सुत्केरी व्यथा लागेकी महिला र बच्चाको उपचारका लागि आवश्यक स्रोत साधन नहुँदा उपचार गर्न नसकिएको स्वास्थ्यकर्मी नारायणी शाहले बताईन ।

घनले लागेर औंला भाँच्चिएका ढिमे–४ का ५ वर्षीय दिनेश खड्कालाई अस्पताल लगेका उनका अभिभावक पनि निराश हुँदै नेपालगञ्जतर्फ लागे ।

अस्पतालमा सामान्य शल्यक्रिया गर्न, असहज अवस्थामा सुत्केरी गराउन सक्ने चिकित्सक र पूर्वाधार नहुँदा यहाँका वासिन्दा हजारौं खर्चेर टाढाको अस्पतालमा जानुपर्छ, नसक्नेले ज्यान गुमाउनु पर्छ ।

असोज २०७२ मै मन्त्रिपरिषद बैठकले जाजरकोट अस्पताललाई ५० शैय्यामा स्तरबृद्धि गर्ने निर्णय गरेको थियो । उक्त निर्णयलाई कार्यान्वयन गर्ने भन्दै १० जेठमा गृहमन्त्री शक्तिबहादुर बस्नेतले गृहजिल्ला आएका बेला ५० शैय्याको अस्पताल शुभारम्भ भएको घोषणा समेत गरे ।

स्तरबृद्धिको घोषणा गरिए पनि अस्पतालको अवस्था फेरिएन ।

“यस्तो अवस्थामा कागजी घोषणाले पीडितलाई जिस्काएजस्तो भएको छ,” भेरीमालिका–१ का दलबहादुर खत्री भन्छन, “आवश्यक पूर्वाधार, चिकित्सक र अन्य जनशक्तिको व्यवस्था भइसकेपछि मात्रै स्तरबृद्धि घोषणा गर्नुपथ्र्यो ।”

स्तरबृद्धि सँगै ८ जना विशेषज्ञ चिकित्सक, ४ जना मेडिकल अधिकृत र अन्य सहायक स्तरका स्वास्थ्यकर्मी सहित ५९ जना स्वास्थ्यकर्मीको दरबन्दी कामय गरी सरकारले अस्पतालको स्तर बृद्धि गर्ने निर्णय गरेको थियो ।

जिल्ला जनस्वास्थ्य प्रमुख डा. राजेन्द्र जिसी अस्पताल स्तरबृद्धिको घोषणा भए पनि आवश्यक पूर्वाधार बिना विशेषज्ञ सेवा प्रदान गर्न नसकिने बताउँछन् ।

डा.जिसीका अनुसार ५० बेडको अस्पतालका लागि आवश्यक अप्रेशन कक्ष, स्वास्थ्य उपकरण, प्रयोगशाला, खानेपानी, बिजुली, बाटो, आवास, पार्किङ्ग स्थल लगायतका पूर्वाधार व्यवस्था गर्न बाँकी नै छ । यी सवै कामका लागि करिब रु ८० करोड आवश्यक पर्ने उनले बताए ।

“विशेषज्ञ चिकित्सक आए नै भने पनि आवश्यक उपकरण र पूर्वाधार नै छैन, कसरी उपचार हुनसक्छ,” जिसीले भने ।

अस्पतालको स्तरबृद्धिका लागि ठूलै संघर्ष गर्नु परेको बताउँछन् अस्पताल विकास समितिका अध्यक्ष नगेन्द्र शाह । “कागजमै भए पनि स्तरबृद्धिको निर्णय गराउन सफल भयौं, अब भौतिक पूर्वाधार र पदपुर्तीको लागि फेरि संघर्ष गर्नु पर्छ,” उनले भने ।

स्वास्थ्य सविच शान्त बहादुर श्रेष्ठले नीतिगत रुपमा विशेषज्ञ चिकित्सकको व्यवस्था भैसकेको र आगामी बजेटमा पूर्वाधार स्थापनाका लागि रकमको व्यवस्था गरिने बताएका छन् ।

अहिलेसम्म अस्पतालमा प्रयोगशाला, इसिजी, अल्ट्रासाउन्ड जस्ता सुविधा छैनन् भने सामान्य खालका शल्यक्रिया गर्नका लागि समेत आवशयक पूर्वाधार छैन ।
राजेन्द्र कार्की, जाजरकोट

प्रतिकृया दिनुहोस