नेकपा एमाले वरिष्ठ नेता तथा पूर्व प्रधानमन्त्री माधवकुमार नेपालले ९ बुँदे बाहेक पनि पर्दा पछाडी सहमति भएकाे बताएका छन् ।

प्रेस चौतारी, पर्साले २० जेठमा वीरगञ्जमा आयोजना गरेको केन्द्रिय पदाधिकारीहरुको सम्मान कार्यक्रममा बोल्दै उनले नेकपा माओवादी केन्द्रसँग अन्य सहमति समेत भएको बताएका हुन । सहमतिहरु समयक्रमसँगै बाहिर आउने पनि नेता नेपालले बताए । उनले भने, “पर्दा पछाडी पनि सहमति भएको छ । आवश्यकता अनुसार बाहिर आउँछ ।”

प्रधानमन्त्री केपी शर्मा ओलीको कार्यशैलीप्रति असन्तुष्टि जनाउँदै आएका नेता नेपालले प्रधानमन्त्रीले भन्ने गरेको चुच्चे रेल अहिलेलाई सपना मात्रै भएको उल्लेख गरे । चुच्चे रेल कहिले आउने ? भन्ने पत्रकारको जिज्ञासामा उनको जवाफ थियो, “चुच्चे रेल अहिलेलाई सपना मात्रै हो । प्रर्याप्त विद्युत नभएसम्म त्यो संभव छैन् ।”

कार्यक्रममा पूर्व प्रधानमन्त्री नेपालले मधेसवादी दलहरुलाई लक्षित गर्दै बन्द हड्ताल र तमाशा बन्द गर्न आग्रह गरे । “हामीले लामो समय राजनीतिक परिवर्तनमा खर्च गरिसकेका छौं । सबैको अधिकार नयाँ संविधानमा समेटिएको छ । छुटेको भएपनि त्यसलाई समेट्न सकिन्छ ।” अब आन्दोलन होइन विकासको लहरमा जोड दिनुपर्ने उनको जोड थियो ।

सरकारले संसदमा प्रस्तुत गरेको बजेटले सांसद, कर्मचारी, जेष्ठ नागरिक, अपाङगता भएका व्यक्तिहरु, विधवा, गाँउ, सहरलाई खुशी बनाएको उनको भनाई थियो । तराई मधेसको विकासका लागि प्रयाप्त बजेट विनियोजन भएको बताउँदै उनले योजना सुन्दर बनेर मात्रै नहुने कार्यान्वयन हुनुपर्ने बताए ।

वीरगञ्ज विकासमा पछाडी परेकोमा उनले चिन्ता समेत व्यक्त गरे । “बाटो समयमा नबने वीरगञ्ज नाका सुक्न सक्छ” नेपालले भने “यहाँका जनतालाई यो कुराले पोल्नुपर्छ । यहाँको विकासका लागि यहीको जनता तात्नुपर्छ ।”

सुरेश बिडारी, वीरगञ्ज

प्रतिकृया दिनुहोस