१७ दिनको दमक बसाईपछि पूर्वराजा ज्ञानेन्द्र शाह २३ जेठमा राजधानी फर्किएका छन् ।

७ जेठमा बिराटनगर हुँदै दमक आइपुगेका उनले यहाँको बसाईका क्रममा पञ्चायत पृष्ठभूमिका स्थानीय, राप्रपा नेपालका नेता र बगान मजदुरहरुसँग भेटघाट गरेका थिए ।

भेट्न आएका कतिपयले पूर्वराजालाई राजनीतिक सक्रियता बढाउन अनुरोध गरेको, केहीले हिमानी ट्रष्टको शाखा विस्तार गर्ने इच्छा देखाएको र केहीले भने आर्थिक सहयोग समेत मागेको बुझिएको छ ।

पूर्वराजा शाहले अरुका कुरा सुन्ने तर आफू भने मौन रहने गरेको भेटघाटका एक सहभागीले बताए ।

काठमाडौं फर्किनु अघिल्लो दिन उनले चियाबगानका मजदुरहरुलाई भेटेर बगानको अवस्थाबारे जानकारी लिएका थिए ।

मजदुरहरुले करिव दुई पुस्तादेखि आफूहरु उक्त बगानम काम गरिरहेको बताँउदै बसोबासको लागि जग्गा उपलब्ध गराइदिन अनुरोध गरेका थिए ।

“बगान कम्पनी अन्तरगत छ, म अहिले चाहेर पनि जग्गा दिन सक्दिन,” पुर्वराजालाई उद्धृत गर्दै भेटमा संलग्न एकजना मजदुरले भने, “तर म तपाईहरुको माग कम्पनीमा पुर्‍याँउछु भन्नुभयो ।”

बगानमा ३१५ मजदुर कार्यरत छन् । कुनै समय उदय चिया उत्पादन गरेको सो बगानले हाल बिना ब्राण्डको चिया उत्पादन तथा बिक्री गरिरहेको छ ।

तात्कालीन राजा महेन्द्रले २०१८ सालमा भाई हिमालयको नाममा स्थापना गरेको पश्चिम झापाको दमक—१५ स्थित हिमालय चियाबगान हिमालयको निधनपछि तत्कालीन अधिराजकुमार एवम् पूर्वराजा शाहको स्वामित्वमा छ ।

५७६ बिगाहमा फैलिएको यो बगानभित्रै रहेको दरबारमा शाह वर्षेनी आएर केही समय विताउने गर्छन् । यसअघि सपरिवार आउने शाहसँग यसपाली भने सचिवालयका कर्मचारीहरु मात्रै थिए ।

उनी आज बिहान ११ः४५ बजे भद्रपुर बिमानस्थलबाट काठमाडौका लागि प्रस्थान गरेका हुन् ।

गोपाल गडतौला, झापा

प्रतिकृया दिनुहोस