नेत्र विक्रम चन्द नेतृत्वको नेकपा माओवादीले आह्वान गरेको नेपाल बन्दका कारण आज राजधानीको जनजीवन प्रभावित भएको छ ।

बन्दका करण सार्वजनिक यातायातका साधन कम चलेका छन् भने निजी सवारीसाधन भने उल्लेखित मात्रामा चलेका छन् ।

महानगरीय प्रहरी परिसरका प्रवक्ता प्रहरी उपरीक्षक प्रद्युम्न कार्कीका अनुसार बन्द गराउँदै हिँडेका २१ जनालाई राजधानीका विभिन्न स्थानबाट पक्राउ गरिएको छ ।

बन्दकर्ताले तीनकुनेमा एक ट्याक्सीमा आगजनी गरेका छन् भने दुईवटा साझा बसमा तोडफोड गरेका छन् । राजधानीको त्रिपुरेश्वर नजिक र एयरपोर्ट नजिक दुईवटा साझा बसमा चालकलाई ताकेर ढुंगा प्रहार गरिएको प्रहरीले जनाएको छ ।

ट्याक्सीमा आगो लगाएको आरोपमा माओवादीका मजदुर नेता र साझा बसमा तोडफोड गरी चालकलाई घाइते बनाउने मध्येका एक जनालाई प्रहरीले नियन्त्रणमा लिएको छ ।

त्यसैगरी,  बन्दकर्ताले  रौतहटमा गुडिरहेको ट्रकमा पेट्रोल बम प्रहार गरेका छन्। बम प्रहारबाट ट्रकका चालक बलराम भण्डारी र सहचालक वसन्त मगर घाइते भएका छन्। उनीहरुको उपचार चन्द्रपुर अस्पतालमा भइरहेको छ।

प्रतिकृया दिनुहोस