नेपाली कांग्रेसका सभापति शेरबहादुर देउवाले किशोरसिंह राठौर (वर्दिया), केशवकुमार बुढाथोकी (झापा) र श्यामकुमार घिमिरे (महोत्तरी) लाई नेपाली कांग्रेस केन्द्रीय सदस्यमा मनोनयन गरेका छन् ।

नेपाली कांग्रेसको विधान, २०१७ (संशोधन र परिमार्जन सहित मिलाइएको रुपमा) को धारा २१ (ठ) बमोजिम राठौर, बुढाथोकी र घिमिरेलाई केन्द्रीय कार्यसमितिको सदस्य पदमा आज मनोनयन गरिएको नेपाली कांग्रेसका मुख्य सचिव कृष्णप्रसाद पौडेलले जानकारी दिएका छन् ।

तीन जना मनोनित भएसँगै कांग्रेसको केन्दीय समिति ७४ सदस्यीय भएको छ।

देउवाले यसअघि १३ औं महाधिवेशनमा आफूसँग पराजित रामचन्द्र पौडेल, कृष्णप्रसाद सिटौला, अर्जुननरसिंह केसी, गगन थापा, चित्रलेखा यादव, उमाकान्त  चौधरी र नरहरि आचार्य  सहितका सात जना नेतालाई केन्द्रीय सदस्यमा मनोनयन गरेका थिए ।

२०-२४ फागुन २०७२ मा सम्पन्न  काठमाडौमस सम्पन्न १३ औं  महाधिवेशनले तीन जना पदाधिकारी र ६१ जना केन्द्रीय सदस्य निर्वाचित गरेको थियो।

कांग्रेसको विधानले सभापतिलाई २१ जना केन्द्रीय सदस्य मनोनित गर्ने अधिकार दिएको छ।

सभापतिले एक जना उपसभापति, एक जना महामन्त्री र एक जना सह-महामन्त्री केन्द्रीय सदस्यमध्येबाट मनोनित गर्ने व्यवस्था पनि छ ।

तर पार्टीको आन्तरिक विवादका कारण देउवाले पदाधिकारीमा कसैलाई मनोनित गर्न सकेका छैनन् ।

कपिल भट्ट, काठमाडौं

प्रतिकृया दिनुहोस